पथरी, २५ असोज / मोरङको पथरी शनिश्चरे ३ को आदर्श टोलमा रहेको पाथीभरा महिला नौमती बाजा समूहको सक्रियताप्रति स्थानीयले ऐक्यवद्धता जाहेर गरेका छन् ।
समूहको प्रथम वार्षिक साधारणसभाका अवसरमा समुदायका विभिन्न क्षेत्रका अगुवाहरुले मौलिक संस्कृति संरक्षणमा नौमती बाजा समूहको कामप्रति प्रशंसा गर्दै सबैको सहकार्यमा मौलिक संस्कृति संरक्षण हुनसक्ने भन्दै संरक्षणमा ऐक्यवद्धता जनाएका हुन् ।
कार्यक्रमका प्रमुख अतिथि ३ नम्बर वडाध्यक्ष विजयकुमार लिम्बुले परापूर्व कालको पुर्ख्यौली बाजा लोप हुँदै गएकाले पुनर्जागरण तथा संरक्षण गर्नका लागि सबैले सहयोग गर्नुपर्ने धारणा राख्नुभयो । उहाँले वडाको तर्फबाट आफूले गर्न सक्ने सहयोग गर्ने पनि प्रतिबद्धता समेत जाहेर गर्नुभयो ।
सभामा बौद्धिक व्यक्तित्व एवम् पञ्चायत माध्यमिक विद्यालयका व्यवस्थापन समिति अध्यक्ष युवराज बास्कोटाले सामाजिक एकता र सद्भाव कायम राख्न महिला नौमती बाजा समूहले पछिल्लो पुस्तालाई पनि सांस्कृतिक समतामूलक समाजको स्थापनाको लागि महत्वपूर्ण भूमिका खेल्ने विश्वास लिनुभएको छ । यो समूहको गतिविधिहरू समाजका सबै नागरिकको जागरण र परिवर्तनका लागि संवाहक बन्ने बताउनुभयो ।
स्थानीय जलेश्वर महादेव मन्दिरको प्राङ्गणमा समूहकी अध्यक्ष तेजमाया कार्कीको अध्यक्षतामा सम्पन्न सो सभामा अर्का स्थानीयबासी कुमारबहादुर पौडेलले पनि बाजा समूहको सक्रियताको निरन्तरताको कामना गर्नुभयो ।
सभामा कोषाध्यक्ष मञ्जु दहालको तर्फबाट आर्थिक प्रतिवेदन प्रस्तुत गर्नुभएको थियो भने अध्यक्ष तेजमाया कार्कीले भावी योजनाका बारेमा पनि प्रतिवेदन पेश गर्नुभएको थियो । समूहका विभिन्न गतिविधि सञ्चालनबाट २ लाख ६२ हजार रूपैयाँ बढी कुल वार्षिक आम्दानी भएको र १ लाख ९३ हजार खर्च भएको सचिव यज्ञनिधि ढुंगाना ’दिपक’ले बताउनुभयो ।
सभामा शान्ति टोल विकास समितिका अध्यक्ष राजकुमार गेलाल, समुहकी उपाध्यक्ष जानुका भण्डारी, पूर्व वडाध्यक्ष डम्बर चेम्जोङ, वाजा गुरु नरबहादुर महतो, जलेश्वर शिवालय मन्दिरका अध्यक्ष चुडाकर्म तुम्वापोले शुभकामना व्यक्त गर्नुभयो ।
