दमक, ५ कार्तिक । आधुनिकताको छाल सँगै हाम्रो मौलिक संस्कृतिहरु बिस्तारै हराउँदै गईरहेका छन् । पहिलेका दिनमा तिहारको समयमा मादल जस्ता परम्परागत बाजा बजाई पुरुषहरुले दौरा सुरवाल लगाउँथे भने महिलाहरुले गुनीउँ चोलो जस्ता आफ्नो संस्कृतीक पहिरन लगाई देउसी भैलो खेल्ने गर्थे । तर, अहिले भने मादललाई गितारले प्रतिस्थापन गरेको छ । तर बदलिदो समयको बिचमा पनि किरात याक्थुङ चुम्लुङ दमक नगरपालिका वडा नं ५ कार्य समितिले भने अधुनिकताको बिचमा पनि आफ्नो संस्कृतीलाई झल्काउने र जोगाउने गरि देउसी भैलो खेलेको छ ।
यो वर्ष मात्र हैन विगतका वर्षहरुमा पनि यस कार्यसमितीले देउसी भैलो मात्र खेल्ने हैन , त्यससगैँ आफ्ना परम्परागत नाचगान, भेषभुषा र सांस्कृतिक प्रस्तुतीहरु समेत प्रदर्शन गर्दै आएको छ ।
पूरुषको पहिरन दौरा र सुरुवाल । अनी ढाका टोपी । महिलाहरु नेपाली जातीय पोषाक अर्थात फरीया, गुन्यू र चोली । अनी शिरमा चन्द्रमा, कम्मरमा पटुकी । किरात याक्थुङ चुम्लुङ दमक नगरपालिका वडा नं ५ कार्य समितीले परम्परा देखी नै वर्षमा एक चोटी देउसी भैलो खेलिने परम्पराको सम्मान गर्दै देउसी भैलो पनि खेल्दै आएको छ ।
यसरी आफ्नो संस्कृती पनि जोगाउने गरि चाडपर्वलाई हर्षका साथ मनाउने उद्धेश्यले यसरी देउसी भैलो खेल्ने गरेको बताउनुहुन्छ देउसी भैलो कार्यक्रममा उपस्थित दमक ५का श्याम माबेन मिक्सो ।
आफ्नो संस्कार र इतिहासलाई भावी सन्तानहरुले पनि नबिर्सिउन र आफ्नो परम्परा र संस्कृतीको पनि जर्गेना होस् भनी यसरी देउसी भैलो खेल्ने गरेको बताउनुहुन्छ अर्का अभियान्ता दल प्रसाद सेवा ।
यस किसिमका देउसी भैलाले भने संस्कृती जोगाउन ठूलो योगदान पुर्याएको छ । आधुनिकताको लहरमा हराईरहेका परम्पराहरु जोगाउन गरिएका यस्तो पहल साँच्चिकै उदाहरणिय छ ।
