मोरङ,८ कार्तिक । जिल्ला कारागार मोरङका एक जना बन्दीको उपचारका क्रममा विराटनगरको नोबेल शिक्षण अस्पतालमा मृत्यु भएको प्रहरीले जनाएको छ । जेलर गौरव ढुंगेलका अनुसार मोरङको सुन्दरहरैँचा नगरपालिका–७ घर भएका ३२ वर्षीय गोपाल भनिने जितप्रसाद सापकोटाको मृत्यु भएको छ।
सापकोटा लागुऔषध मुद्दाका बन्दी थिए। ढुंगेलका अनुसार अचानक शरीर सुन्निने, सास फेर्न गाह्रो हुने समस्या देखिएपछि उनलाई उपचारका लागि असोज २७ गते राति विराटनगरकै कोशी अस्पतालमा भर्ना गरिएको थियो । स्वास्थ्य अवस्था थप जटिल बनेपछि कात्तिक ६ गते बिहीबार राति कोशी अस्पतालले रेफर गरेको थियो। त्यसपछि थप उपचारका लागि सापकोटालाई नोबेल अस्पताल लगिएको थियो । उनको उपचारकै क्रममा नोबेलमा शुक्रबार राति ९ बजेतिर मृत्यु भएको जेलर ढुंगेलले बताए । सापकोटाको फोक्सोमा पानी जमेको र कलेजो पूर्णरूपमा खराब भएकाले बचाउन नसकिएको जानकारी उपचारमा संलग्न चिकित्सकले दिएको उनले बताए ।
लागुऔषध मुद्दा चलाइएका सापकोटालाई जिल्ला अदालत मोरङले गत साउन १२ गते पुर्पक्षका लागि थुनामा राख्न आदेश दिएको थियो । अदालतको आदेशपछि जिल्ला कारागार मोरङ चलान गरिएका सापकोटाको मुद्दा विचाराधीन रहेको छ । आफूविरुद्ध चलेको मुद्दाको फैसला नहुँदै उनको भने मृत्यु भएको छ। शव अन्त्येष्टिका लागि परिवारले जिम्मा लिएर लगिसकेको ढुंगेलले बताएका छन् ।
मोरङ कारागारमा हाल १ हजार १ सय ८७ जना कैदीबन्दी रहेका छन् । तीमध्ये १ हजार ७५ पुरुष र १ सय १२ जना महिला रहेको ढुंगेलले बताएका छन् ।
एआइ तस्बीर
