काठमाडौँ,८ कार्तिक । मनसुनी वर्षाले देश छोडेसँगै चिसो हावाको सिरेटो सुरु भएको छ। यो चिसो मौसमसँगै नेपालमा बसाइँ सर्ने चराहरूको आगमन हुन थालेको छ।
हरेक वर्ष १०० भन्दा बढी प्रजातिका चराहरू बसाइँ सरेर नेपाल आउने गर्दछन्। तीमध्ये धेरैजसो पानी चरा र हाँसहरू रहेका छन्। यसबाहेक चिल, बाज, फिस्टे, गिद्धजस्ता अन्य चराहरू पनि उपयुक्त मौसमको खोजीमा नेपाल आइपुग्ने गर्द छन्।
हालसम्म ९०० भन्दा बढी प्रजातिका चराहरू नेपालमा अभिलेख भइसकेका छन्। कयौँ प्रजातिका चराहरू नेपालमा विश्राम मात्र गरेर अन्य देशहरूमा जान्छन् भने कर्याङकुरुङजस्ता केही प्रजातिका चराहरू नेपालमा विश्राम नगरी आकाशबाटै भारततर्फ जाने गर्द छन्।
जाडो याममा नेपाल आउने चराहरू कोशी, कर्णाली, नारायणी, राप्ती, फेवा ताल, जगदिशपुर ताल, घोडाघोडी ताल, बर्जु तालजस्ता ठुला नदी र पोखरीहरूमा बस्न धेरै रुचाउँछन्। हरेक वर्ष जनवरी महिनामा देश वरपरका प्रमुख वासस्थानहरूमा बसाइँ सरेर आएका पानी चराहरूको गणना हुन्छ र लाखौँको सङ्ख्यामा अभिलेख गर्ने गरिन्छ।
चखेवा, खोया हाँस, आसिढुँडे, ध्वाँसे फिस्टो, खड्खडे हाँस, सुइरोपुच्छ्रे आदि चराहरू ठूलो सङ्ख्यामा नेपाल आउँछन् भने श्वेतमाथा कलहाँस, देवदुत मनितुन्दक, देवहाँस जस्ता चरा निकै कम सङ्ख्यामा आउने गर्द छन्।
