इलाम,१३ कार्तिक । मेची राजमार्गमा रातको समयमा सवारी साधन सञ्चालनमा रोक लगाइएको छ । जिल्ला प्रशासन कार्यालय इलामले बिहीबार साँझ ७ देखि शुक्रबार बिहान ६ बजेसम्मका लागि सवारी सञ्चालनमा रोक लगाएको जनाएको छ ।
जल तथा मौसम विज्ञान विभाग तथा राष्ट्रिय विपद् जोखिम न्यूनीकरण तथा व्यवस्थापन प्राधिकरणको सूचनाका आधार मोन्था चक्रवतका कारण वर्षा हुने र बाढीपहिरोको प्रकोप हुन सक्ने भएपछि मेची राजमार्गमा जोखिम कम गर्नका लागि रातको समयमा यातायात सञ्चालनमा रोक लगाइएको इलामका सहायक प्रमुख जिल्ला अधिकारी भोलानाथ गुराँगाईले ताँउनु भयो ।
मेची राजमार्गको माइखोला(राजदुवाली) सडक खण्डसहित विभिन्न स्थानमा गत असोज १८ गतेको बाढीपहिरोपछि सडक खण्ड जोखिम रहेको छ । असोज १८ को बाढीपहिरोले इलाममा ३९ जनाको ज्यान गएको थियो भने ३३६ घरमा पूर्ण र ८२८ घरमा आंशिक क्षति भएको थियो ।
इलामको माइजोगमाई गाउँपालिकाले बिहिबार र शुक्रबार दुई दिनका लागि विद्यालय बन्द गरेको जनाएको छ । पालिकाले जोखिम कायम रहेकाले बालबालिकाको सुरक्षाका लागि विद्यालय बन्द गरेको गाउँपालिका अध्यक्षक कुश बहादुर थेवेले बताँउनु भयो । इलामका अधिकांश स्थानमा बिहानैदेखि सिमसिमे झरि परिरहेको छ ।
