दमक, १५ कार्तिक । मोन्था चक्रवातको प्रभावका कारण बिहीबार रातिदेखि परेको अविरल वर्षाले दैनिक जनजीवन मात्र होइन, किसानका बालीमा समेत ठुलो क्षति र्पुयाएको छ। वर्षभरी खान पुग्ने गरी लगाइएको पाकेको धान काट्ने बेलामा आएको बेमौसमी वर्षाले खेतमा पानी जम्दा धान डुबेर नष्ट हुन थालेपछि किसानहरू मर्कामा परेका छन्। ।
चरम खडेरीका कारण ढिलो धान रोपाइँ गरेका मध्य र पूर्वी नेपालका किसान बाली भित्र्याउने वेला बेमौसमी वर्षाका कारण मारमा परेका छन्।। बुधबार रातिदेखि परेको पानीले कतिपय ठाउँमा काटिसकेको धान डुबाएको मात्रै छैन, पाकिसकेको धान पनि ढलेर डुबानमा परेको छ । विशेष गरी शुक्रबार तराईका जिल्लामा ठुलो पानी र्पयो । बढी धानखेती हुने सोही क्षेत्रमा बिहीबार साँझदेखि हावाहुरीसहित आएको वर्षाले काट्न ठिक्क भएको धान लडाएर क्षति पुगेको छ । दमक सहितका आसपासका क्षेत्रमा पनि ठुलो मात्रामा किसानका बालीमा क्षति पुगेको छ ।
दमक १० का किसान चुडामणी नेपालले छिटो थन्क्यााउन भनि धान काट्नुभयो तर, त्यस लगतै लगातारको वर्षाले गर्दा धान काटेर राखिएको खेतैमा पानी जमेर सबै धान डुबेर नष्ट भयो। अहिले उहाँ क्षतिभएकोमा चिन्तित त हुनुहुन्छ नै तर यस्तो अवस्थामा सरकारको राहतको अपेक्षा गर्न पनि नसकेको उहाँको भनाई छ ।
त्यसैगरी अर्का किसान गणेश ढुंगेल वर्षाले गर्दा खेतमा घुडाघुडासम्म पानी जमेको छ । त्यही पानी माथी धान ढलेर डुबेको छ । अब यस्तोमा वर्षभरी के खाने हो भनेर चिन्तीत हुनुहुन्छ। खेती गर्न धेरै श्रम र लगानी लाग्यो । सरकारले केहि क्षतिपूर्ति दिए आफूहरुलाई राहत पुग्ने उहाँको अपेक्षा छ ।
लगभग दुई बिगाहा जग्गामा धान लगााउनुभएकी किसान मेनुका बरालले भने बाली नष्ट भएपछि काटिएका धान गाईवस्तुलाई खुवाउन थालेको बताउनुभयो ।
यस्तै धानबालीमा क्षति पुगेका अर्का किसान लक्ष्मी प्रसाद बराल भने प्राकृतिक प्रकोपले गरेको क्षतिलाई बैकल्पिक बालीबाट क्षतिको पूर्ति गर्नुपर्ने धारणा राख्नुहुन्छ । यसका लागि सरकारले अब राहतका साथै मकै वा अन्य वैकल्पिक बालीका बीउ उपलब्ध गराउनुपर्ने उहाको धारणा छ ।
यो समस्या केवल दमकको मात्र नभई देशभरका तराई क्षेत्रका किसानहरूको साझा पीडा बनेको छ। महिनौ लगाएर गरेको परिश्रमको उपभोग गर्ने बेलामा क्षति हुदा किसान पीडामा छन् । किसानहरू अहिले राज्यबाट राहत र वैकल्पिक सहयोगको अपेक्षामा समेत छन्।।
