काठमाडौँ,१६ कार्तिक । निर्वाचन आयोगले सुनसरीस्थित धरान उपमहानगरपालिकाका प्रमुख(मेयर) हर्क साम्पाङको श्रम संस्कृति पार्टी दर्ता गरेको छ । साम्पाङले आइतबार आयोगमा पुगेर पार्टीको दर्ता प्रमाणपत्र लिनु भएको छ। आयोगमा २ सय ४ नम्वरमा दर्ता भएको श्रम संस्कृति पार्टीको केन्द्रीय कार्यालय काठमाडौं महानगरपालिका वडा नम्वर ४ मा रहने प्रमाणपत्रमा उल्लेख गरिएको छ ।
आफ्नो दलले औपचारिक मान्यता पाएपछि साम्पाङले देश बिकासका लागि श्रमको परिचालन गर्ने लक्ष्यका साथ अघि बढ्ने बताउनु भयो । युवाहरुलाई श्रममा जोड्न सामाजिक अभियानको जागरणलाई प्रभावकारी रुपमा अघि बढाइने उहाँले बताँउनु भयो।
उहाँले धरान उपमहानगरपालिकाभित्र रहँदा मेयर र बाहिर निस्कदा सामाजिक अभियान्ताका रुपमा प्रस्तुत हुने उल्लेख गर्नु भयो । हाल उक्त पार्टीमा पाँच पदाधिकारीसहित २८ केन्द्रीय सदस्य रहेका छन् । पार्टीको चुनाव चिह्न माटोको ढिस्को राखिएको छ । पार्टीलाई आयोगले मान्यता दिएपछि साम्पाङले भन्नु भयो– गफले मात्रै रोजगारी सिर्जना हुँदैन ।
उहाँले रोजगारी सिर्जनाको लागि उत्पादन बढाउनुपर्ने बताउनु भयो । श्रम संस्कृति पार्टीले उत्पादन, निर्माण, सामाजिक रूपान्तरण र आर्थिक रूपान्तरणको लागि फिल्डमा खटेर काम गर्ने उहाँको भनाई छ । उहाँले उत्पादन बढाउन नसक्दा प्रायः नेपाली बेरोजगार हुनुपरेको बताउनु भयो । उहाँले देश आफैँले बनाउने मौलिक शैली अपनाउने उल्लेख गर्नु भयो ।
देश विदेशी ऋणले मात्रै नचल्ने बताउँदै उहाँले देश अब नेपाली आफैँले बनाउनुपर्नेमा जोड दिनु भयो । उहाँले गरिबी, अभाव र यसकै कारणले हुने विभिन्न खालका ठगी, भ्रष्टाचार, बेइमानीलाई अन्त्य गर्ने बताउनु भयो ।
उहाँले भन्नु भयो,‘जुन काम आजसम्म भएन, यत्तिका वर्षसम्म । त्यो काम गर्ने हो । उत्पादन, निर्माण, सामाजिक रुपान्तरणका लागि, आर्थिक रूपान्तरणको लागी हामी अब फिल्डमा निस्केर काम गर्छौँ । अफिसमा बसेर भाषणमा सीमित हुँदैनौँ । हामी चाहिँ पक्का फिल्डका काम गर्ने एउटा सङ्गठन निर्माण गर्दै छौँ । पहिला त यो देशमा काम गर्नुपर्छ । उत्पादन बढाउनुपर्छ । हामी सबै बेरोजगार छौँ प्रायः । रोजगारीको सिर्जना गफले हुँदैन । विदेशी ऋणले नि चल्दैन यो देश । त्यसले गर्दाखेरि यो देश अब हामी आफैँले बनाउनुपर्छ भन्ने हाम्रो मौलिक शैली छ । ती शैलीलाई हामीले बिर्सियौँ । त्यो मौलिक शैलीहरूलाई पनि हामीले फेरि उजागर गर्छौ ।’
उहाँले आफूहरूले दलको झण्डा नराख्ने बताउनु भयो । लोकतन्त्रमा विश्वास राख्ने भएकोले आवधिक निर्वाचनमा पार्टीले भाग लिने उहाँको विचार छ । निर्वाचनको लागि तयारी पनि भइरहेको उहाँले बताँउनु भयो ।
उहाँले परम्परागत राजनीतिक दलजस्तो आफ्नो पार्टी नहुने पनि दाबी गर्नुभयो । हरेक टोलमा पार्टीले काम गर्ने श्रमदाता बनाउने उहाँले बताउनु भयो । निर्वाचन आयोगले साम्पाङको पार्टीलाई आइतबार मान्यता दिएको छ । साम्पाङले आज आयोगमा पुगेर पार्टीको मान्यताको प्रमाणपत्र समेत लिनु भएको छ ।
