दमक, २६ कार्तिक ।देशको राष्ट्रिय झण्डा र एकता सन्देशसहितका प्लेकार्ड बोकेर राष्ट्रिय गीतमा ताल मिलाउँदै अघि बढेका युवाको समूह आज दमकमा एक विशेष उद्देश्यका साथ एकत्रित भयो । ‘जेन्जी युनाइटेड अभियान’अन्तर्गत आयोजित यो शान्तिपूर्ण पैदलयात्रा विगत भदौ महिनामा भएको आन्दोलनपछि तितरबितर बनेका जेन्जी युवाहरूमाझ एकताको सन्देश फैलाउने उद्धेश्यले गरिएको हो ।
भदौ २३ र २४ गते देशभर जेन्जी समूहले भ्रष्टाचार नियन्त्रण र सुशासन कायम गर्न माग गर्दै व्यापक आन्दोलन सञ्चालन गरेको थियो । तर आन्दोलनपछि जेन्जीहरू विभिन्न गुट–उपगुटमा विभाजित हुँदा संगठन कमजोर बन्दै गएको संयोजकहरूले बताएका छन् । यही विभाजनको फाइदा पुराना राजनीतिक दल र तिनका कार्यकर्ताले उठाएको र आन्दोलनको औचित्य कमजोर पार्ने प्रयास भइरहेको आरोप आयोजकहरूको छ ।
त्यसैको प्रतिक्रियास्वरूप देशभर एकताको लहर फैलाउन थालिएको अभियान आज दमकमा पुगेको हो । गोर्खा डिपार्टमेन्ट स्टोरबाट सुरु भएको पैदलयात्रा थानारोड, नमुना मार्ग, शंकरधर चौक र फर्निचर लाइन हुँदै पुनः गोर्खा डिपार्टमेन्ट स्टोरमा आइपुगेको थियो । यात्राको अन्त्यमा कोणसभा समेत गरिएको थियो ।कार्यक्रमकी संयोजक अन्जना राईले पछिल्ला दिनमा जेन्जीहरू विचलित र विखण्डित हुँदै गएको अवस्थालाई मध्यनजर गर्दै एकताको सन्देश फैलाउने उद्देश्यले अभियान सुरु गरिएको बताउनुभयो ।
त्यस्तै कोणसभामा बोल्दै जेन्जी युवा प्रज्वल गिरीले जेन्जी समूहहरूको एकता अबको अपरिहार्यता भएको बताउनुभयो । उहाँले परिवर्तन चाहने सबै जेन्जी, जेन वाई र जेन एक्स पुस्तालाई पनि साझा उद्देश्यका लागि एउटै मञ्चमा आउन आह्वान गर्नुभयो ।
पूर्व मेचीदेखि पश्चिम महाकालीसम्म फैलने लक्ष्यसहितको यो अभियान ताप्लेजुको फुङलिङ बजारबाट सुरु भएको हो । झापाको बिर्तामोडमा सम्पन्न कार्यक्रमपछि अभियान आज दमकमा सम्पन्न भएको आयोजकहरूले जनाएका छन् । जेन्जी युनाइटेडका अनुसार, यो अभियान क्रमशः जिल्ला हुँदै प्रदेश र केन्द्रसम्म विस्तार हुँदै जानेछ । कार्यक्रमको अन्त्यमा युनाईटेडले सडक नाटक समेत प्रर्दशन गरेको थियो । जसमा देशका बिभिन्न कालखण्डमा भएका आन्दोलनमा परिवर्तनका पक्षमा उत्रिएका नागरिकहरुमाथी हुने गरेका दमनहरुलाई देखाईएको थियो । उक्त नाटकमा ईतिहासमा भएका आन्दोलन देखि हालै भएको जेन्जी आन्दोलनलाई समेटिएको कार्यक्रमकी संयोजक अञ्जना राईले जानकारी दिनुभयो ।
