दमक,११ मंसिर । दमक नगरपालिका–७, सयपत्री टोलस्थित कैयुब मन्सुरीले संचालन गर्दै आएको सिरक–डसना उत्पादन गर्ने गोदाममा आज अचानक आगलागी भएको छ। विद्युत् सर्ट भएको आशंकामा गोदामभित्र रहेका कर्मचरीहरूले आगो लागेको देखेपछि तत्काल खबर गरे पनि आगो छिट्टै फैलिएको थियो। गोदाममा राखिएका सबै सामग्री तथा डसना उत्पादनका मेसिन पूर्णरूपमा जलेर नष्ट भएको सञ्चालक मन्सुरीले बताए। उनका अनुसार करिब ७ लाख रुपैयाँ बराबरको क्षति भएको प्रारम्भिक अनुमान गरिएको छ।
घटनास्थलमा दमक नगरपालिकाको वारुण यन्त्र प्रयोग गर्दै इलाका प्रहरी कार्यालय दमकका प्रहरी तथा नगरप्रहरीको संयुक्त टोलीले आगो नियन्त्रणमा ल्याएको हो। समयमै दमकल पुगेपनि , गोदाम भित्र सबै कपडा भएकाले आगो लागेको १५ मिनेट नपुग्दै सबै सामान जलेर नष्ट भएको प्रतक्षदर्शीहरुले बताएका छन् । आगलागीको वास्तविक कारणबारे थप अनुसन्धान भइरहेको इलाका प्रहरी कार्यालय दमकले जनाएको छ।
