झापा,१५ मंसीर । पूर्वी नाका काँकरभिट्टाबाट चालु आर्थिक वर्षको चार महिनामा १६ अर्ब बढीको मालवस्तु आयात हुँदा ८ अर्बको निर्यात भएको स्रोतले जनाएको छ । चालु आर्थीक वर्ष २०८२÷८३ को साउन महिनादेखि कात्तिक मसान्तसम्म १६ अर्ब दुई करोड पाँच लाख तीन हजार बराबरको मालवस्तु आयात भएको मेची भन्सार कार्यालयका सूचना अधिकारी ईश्वर कुमार हुमागाईंले जानकारी दिनु भयो ।
चार महिनाको अवधिमा कार्यालयले आयात र निर्यातबाट ५ अर्ब ४६ करोड एक लाख ९८ हजार राजस्व सङ्कलन गरेको हो । आयातबाट पाँच अर्ब ३३ करोड ६७ लाख ३८ हजार र निर्यातबाट १२ करोड ३४ लाख ६० हजार राजस्व सङकलन गरेको छ । राजस्व असुलीमा भने १५ दशमलब ६६ प्रतिशत अर्थात ७३ करोड ९४ लाख ७५ हजार वृद्धि भएको छ ।
काँकरभिट्टा नाकाबाट निर्यात हुने मुख्य १० वस्तुमध्ये अलैँची, भेनियर सिट, कुकुर वा बिरालोको खाना, अदुवा÷सुठो, काउली, बन्दाकोपी र ब्रोकाउली र मुसुरो दालको निर्यात वृद्धि भएको छ, भने चिया, प्लाइउड, अमलिसो र फलामे पाताको निर्यातमा कमी आएको स्रोतले जनाएको छ ।
अलैँची निर्यात दोब्बर बढीले वृद्धि भएको हो । ३ अर्ब ९७ करोड ४३ लाख ७३ हजारको अलैँची निर्यात भएको छ । जुन गत वर्षको सोही अवधिको तुलनमा १०९.२ प्रतिशत अर्थात् रु २ अर्ब ७ करोड ४१ लाख ३२ लाखले बढी छ। चिया निर्यातमा भने झण्डै एक तिहाइ गिरावट आएको छ । चालु आर्थिक वर्षको चार महिनामा १ अर्ब ३७ करोड ३० लाख ७७ हजार बराबरको चियाको निर्यात भएको छ । जुन अघिल्लो वर्षको सोही अवधिको ३७ प्रतिशतले कमी भएको छ ।
प्लाइउड निर्यातमा ५२ दशमलब ७ प्रतिशतले कमी आएको छ । गत आर्थिक वर्षको कात्तिक मसान्त सम्ममा १ अर्ब २५ करोड ७२ लाख ५९ हजार बराबरको प्लाइउड निर्यात भएकोमा चालु आर्थिक वर्षको सोही अवधिमा ५९ करोड ५० लाख १८ हजारको मात्र निर्यात भएको हो । जुन अघिल्लो आर्थिक वर्षको तुलनामा ६६ करोड २२ लाख ४१ हजारले कमी भएको छ।
यता, भेनियर सिटको निर्यात १३५ दशमलब ८ प्रतिशत वृद्धि भएको छ । गत आर्थिक वर्षमा १६ करोड ४५ लाख १२ हजारको निर्यात भएकोमा चालु आर्थिक वर्षमा ३८ करोड ६२ लाख ६८ हजारको निर्यात भएको छ । जुत अघिल्लो आर्थिक वर्षको तुलनामा २२ करोड १७ लाख ६८ हजारले बढी हो । कुकुर र बिरालोको खाना निर्यातमा ३३ प्रतिशत वृद्धि भएको छ । चालु आर्थिक वर्षको चार महिनामा ३७ करोड ९९ लाख १२ हजारको कुकुर र बिरालोको खाना निर्यात भएको मेची भन्सार कार्यालयले बताएको छ ।
अमलिसो निर्यातमा २३ दशमलब ९ प्रतिशतले गिरावट आएको छ । २६ करोड २५ लाख ६३ हजार बराबरको अमलिसो निर्यात भएको छ । अदुवा÷सुठो निर्यात ३.२ प्रतिशतले वृद्धि भएको छ । २४ करोड २४ लाख १६ हजार बराबरको अदुवा÷सुठो निर्यात भएको छ । काउली, बन्दाकोपी र ब्रोकाउलीको निर्यात भने ३६ दशमलब १ प्रतिशतले वृद्धि भएको छ । चालु आर्थिक वर्षमा ११ करोड ३१ लाख ९१ हजार बराबरको काउली, बन्दाकोभी र ब्रोकाउलीको निर्यात भएको कार्यालयको तथ्याङ्कमा उल्लेख छ ।
मसुरो दाल निर्यातमा व्यापक वृद्धि भएको छ । ४८१ प्रतिशत मुसुरो दाल निर्यात वृद्धि भएको कार्यालयले बताएको छ । ९ करोड १२ लाख ८७ हजार बराबरको मुसुरो दाल यो नाकबाट निर्यात भएको छ । अघिल्लो आवको सोही अवधिमा १ करोड ५७ लाख १३ हजार बराबरको मुसुरो दाल निर्यात भएको हो । चालु आर्थिक वर्षमा ३ करोड ७८ लाख ८३ हजार बराबरको मात्र फलामे पाता निर्यात भएको कार्यालयले बताएको छ । फलामे पाता निर्यात ९७ दशमलब ३ प्रतिशतले गिरावट आएको छ ।
