पथरी शनिश्चरे समाचारदाता,मङ्सिर –२१ । अन्तर्राष्ट्रिय आमन्त्रण दोस्रो इन्ट्रा पथरी शनिश्चरे गोल्डकप –२०८२ को आम्दानी र खर्च प्रस्तुत गरिएको छ । शनिबार मोरङको पथरी शनिश्चरे वडा नं १ स्थित शिखर चोकको पथरी ११ फुटबल क्लबले पत्रकार सम्मेलनको आयोजना गरेको हो।
पत्रकार सम्मेलनमा प्रतियोगिताको लागि कुल ४५ लाख ४० हजार १५० रुपैयाँ आम्दानी भएको, ४२ लाख ३६,२ ०० खर्च भएको र क्लबको खातामा ३लाख ३ हजार ९५० रुपैयाँ वचत रहेको प्रेस विज्ञप्ति पढेर सुनाउनु भएको थियो।
सो खुल्ला नकआउट फुटबल प्रतियोगिता गत कात्तिक १५ गतेदेखि २२ गतेसम्म सफलताको पूर्वक संचालन भएको थियो।
उक्त गोल्डकपलाई सभ्य र भव्य सफल बनाउन महत्वपूर्ण भूमिका निर्वाह गरी आर्थिक, नैतिक र भौतिक सहयोग प्रदान गर्ने पथरीशनिश्चरे नगरपालिका तथा नगर खेलकुद समिति, मुख्य प्रायोजक इन्ट्रा फाउण्डेसन अमेरिका, सांग्रिला युथ फुटबल क्लव अमेरिका, के. आई. ई. सी. इटहरी, पथरीशनिश्चरे नगर , फस्ट लिङ्क, सिद्धार्थ वैङ्क, ब्रिटिस आर्मी, विभिन्न संचारमाध्यममा कार्यरत सञ्चारकर्मीहरू, आयोजक उपसमितिका सदस्यहरू, दर्शकहरू लगायत संस्थागत एवम् व्यक्तिगत रुपमा सहयोग गर्नु हुने सम्पूर्णमा आयोजकले हार्दिक आभार सहित धन्यवाद दिएको छ।
सोही क्रममा क्लबका अध्यक्ष सुमन बिकले हरेक वर्ष आयोजना गरिने लक्ष्य राखिएको उक्त दोस्रो संस्करणको यो प्रतियोगिताले युवा जनशक्तिलाई सहि मार्गदर्शन गरी राष्ट्र निर्माणमा थोरै भए पनि इट्टा थपेको विश्वास व्यक्त गर्नुभयो। उहाँले पथरी –११ फुटबल क्लब, आगामी दिनमा समेत यस्तै प्रकारका सामाजिक, आर्थिक साथै पूर्वाधार विकासका कार्यक्रमहरु लिएर आइराख्ने प्रतिवद्धता जनाउनु भएको थियो।
उक्त अवसरमा उक्त गोल्डकप प्रतियोगितालाई सफल तुल्याउन महत्वपूर्ण भूमिका निर्वाह गर्नुहुने विभिन्न संचार माध्यमका पत्रकारहरूलाई सम्मानपत्रद्वारा सम्मानित गरिएको थियो।
फाउन्डेसन अफ अमेरिकाका नेपाल प्रतिनिधि राम बानियाको प्रमुख आतिथ्यतामा भएको उक्त सम्मेलनमा क्लबका विभिन् विभिन्न पदाधिकारीहरूको उपस्थिति थियो।
