- दमक,२ पुस । पूर्वी नेपालका लोकधुनलाई गीत–संगीतमार्फत चिनाउँदै आएका पुराना लोक गायक सिताराम ताजपुरीयालाई झापाको दमकमा सम्मान गरिएको छ ।
क्रिसमसको अवसर पारेर दमक नगर इसाई समाजले आयोजना गरेको कार्यक्रममा कला र संगीतको क्षेत्रमा अतुलनीय योगदान पुर्याएको भन्दै गायक ताजपुरीयालाई नगद १५ हजार रुपैयाँ, दोसल्ला र सम्मानपत्र प्रदान गरिएको हो ।
गीत–संगीतको माध्यमबाट पूर्व क्षेत्रको पहिचान स्थापित गर्न उहाँले खेलेको भूमिकाको उच्च मूल्याङ्कन गर्दै समाजले सम्मान गरेको जनाएको छ । सम्मान कार्यक्रमकी प्रमुख अतिथि दमक नगरपालिकाकी उप–प्रमुख रेगिना भट्टराई प्रसाईंले लोकसंगीतले समाज, संस्कृति र पहिचान जोड्ने काम गरेको बताउँदै कलाकारको योगदान सधैं स्मरणीय रहने उल्लेख गर्नुभयो ।
कार्यक्रममा दमक नगर इसाई समाजका अध्यक्ष हेमन्त सुब्बा, पूर्व अध्यक्ष तथा ख्रिष्टमस विशेष शुभकामना आदान–प्रदान तथा सांगीतिक कार्यक्रमका संयोजक आकाश थुलुङ, सल्लाहकार राजकुमार राई लगायतले गायक ताजपुरीयालाई सम्मान गर्नुभएको थियो ।
