दमक ८ पुस । दमक उद्योग वाणिज्य संघको निर्वाचन नजिकिँदै जाँदा दमकको बजार फेरि एकपटक चुनावी सरगर्मीले तातेको छ। बिहानदेखि साँझसम्म उम्मेदवारहरू पसल–पसल धाइरहेका छन्। हात मिलाइरहेका छन्, समस्या सुन्दै छन्, आश्वासन बाँडिरहेका छन्। तर बजारभित्रको माहोल भने यसपटक अलि फरक छ। व्यवसायीहरू भोटसँगै जवाफ पनि खोजिरहेका छन्।
चुनावको समयमा कर, बजार व्यवस्थापन, अनुगमनको नाममा हुने झन्झट, पार्किङ समस्या, सुरक्षा, स्थानीय सरकारसँग समन्वय र व्यापारिक वातावरण सुधारका ठूला कुरा सुनिन्छन्। तर धेरै व्यवसायीको अनुभव एउटै छ। चुनाव जितेपछि ती प्रतिबद्धता कागजमै सीमित हुन्छन्।
वर्षौँदेखि दमकको बजार उही समस्यामा अल्झिएको छ। अनुगमनको त्रास, अनियमित शुल्क, नीतिगत अस्पष्टता र स्थानीय तहसँग प्रभावकारी संवादको अभाव। व्यवसाय विस्तारको सम्भावना हुँदाहुँदै पनि नेतृत्वको कमजोर हस्तक्षेपका कारण अवसरहरू खेर गइरहेको व्यवसायीहरूको बुझाइ छ।
नमस्ते दमक रिकन्डिसनका सञ्चालक सुसन अर्याल उद्योग वाणिज्य संघको नेतृत्व सबै उमेर समूहका व्यवसायीलाई समेट्न सक्ने हुनुपर्ने बताउनुहुन्छ। विशेषगरी रिकन्डिसनजस्ता व्यवसाय सञ्चालन गर्नेहरू झनै चुनौतीमा पर्ने गरेको उहाँको भनाइ छ।
उहाँको भनाइले दमकको बदलिँदो व्यवसायिक संरचना देखाउँछ। परम्परागत व्यापारसँगै नयाँ प्रकृतिका व्यवसायहरू बढ्दै छन्। तर संघको नीति र नेतृत्व भने अझै पुरानै ढर्रामा अड्किएको आरोप छ।
क्लासिक बाइक एण्ड कार केयरका सञ्चालक देव खनालको गुनासो पनि उस्तै छ। संघ चुनावमुखी मात्रै नभई व्यवसायमुखी बन्नुपर्ने उहाँको धारणा छ। उम्मेदवारहरू नीति र दीर्घकालीन योजनाभन्दा गुट, समूह र व्यक्तिगत समीकरणमा अल्झिएको उहाँ बताउनुहुन्छ।
दमकको बजारमा लगानी, सेवा र रोजगारी सिर्जनाको ठूलो सम्भावना छ। पूर्व–पश्चिम राजमार्ग, औद्योगिक पहुँच, उपभोक्ता बजार र युवा जनशक्ति दमकका बलिया पक्ष हुन्। तर ती सम्भावनालाई अवसरमा बदल्न सक्षम, निडर र संवादमुखी नेतृत्व आवश्यक रहेको व्यवसायीहरूको जोड छ।
आयान रिकन्डिसनका सञ्चालक उत्तम यादव ठूलो नारा होइन, व्यवहारिक नेतृत्व चाहिएको बताउनुहुन्छ। चुनावपछि पनि बजारमै देखिने, व्यवसायीको दुःख–सुखमा साथ दिने संघ नेतृत्वको अपेक्षा उहाँको छ।
दमकका व्यवसायीहरू यसपटक स्पष्ट छन्। संघ केवल चुनाव जित्ने प्लेटफर्म नबनोस्, व्यवसायीको साझा आवाज बन्न सकोस्। स्थानीय सरकारसँग मजबुत संवाद गरोस्, अनावश्यक अनुगमनको त्रास हटाओस् र नयाँ व्यवसायिक सम्भावनाको ढोका खोलोस्।
