दमक, ९ पुष । आगामी पुस १८ गतेका लागि तोकिएको दमक उद्योग वाणिज्य संघको निर्वाचनले यतिबेला बजारमा चुनावी माहोल तातेको छ। अध्यक्षसहित तीन वटा प्यानल लिएर उम्मेदवारहरू बिहानदेखि साँझसम्म व्यवसायीका पसल–पसल पुगिरहेका छन्। हात मिलाउने, गुनासा सुन्ने र आश्वासन दिने क्रम तीव्र छ।
व्यवसायीहरू पनि यो निर्वाचनलाई चासोका साथ हेरिरहेका छन्। अब संघको नेतृत्व कसले गर्ने, कस्तो व्यक्ति आउने र त्यो नेतृत्वले साँच्चै व्यवसायीको आवाज सुन्छ कि सुन्दैन भन्ने विषयमा बजारमा बहस सुरु भइसकेको छ। के भन्छन् त दमकका व्यवसायीहरू?
केही समयअघि मात्रै नयाँ कपडा व्यवसाय सुरु गरेका सुवास चन्द्र संग्रौलाका लागि वाणिज्य संघसँगको पहिलो अनुभव नै पीडादायी बन्यो। शुक्रबार अनिवार्य पसल बन्द गर्नुपर्ने नियमबारे जानकारी नहुँदा उहाँले पसल खोलेकै अवस्थामा वाणिज्य संघका केही सदस्य आएर बन्द गर्न लगाए। तर, आफ्नै पसलको छेउछाउका अन्य पसलहरू भने शुक्रबार खुलेका थिए, जहाँ कसैले केही भनेन।
उहाँको गुनासो छ , ‘वाणिज्य संघले नियम लागू गर्दा समान व्यवहार गर्दैन। सामान्य र नयाँ व्यवसायीलाई मात्रै नियम देखाइन्छ, प्रभावशाली र पुराना व्यवसायीलाई छुट दिइन्छ।’ यही कारण, संघको नेतृत्व सबैका लागि बराबर हुनुपर्ने उहाँको जोड छ।
यस्तै, सुभानी शु सेन्टरका सञ्चालक सुजन थपलिया संघको नेतृत्व व्यक्तिगत स्वार्थभन्दा माथि उठ्नुपर्ने बताउनुहुन्छ। उहाँका अनुसार, वाणिज्य संघ कुनै एक समूह वा व्यक्तिको होइन, सम्पूर्ण व्यवसायीको साझा संस्था हो। त्यसैले नेतृत्व गर्ने व्यक्ति “आफ्नो–अर्काको” नभनी सबै व्यवसायीको हकहितमा उभिन सक्ने हुनुपर्छ। तीन जना उम्मेदवारमध्ये सबैभन्दा योग्य, इमानदार र व्यवसायीको पीडा बुझ्ने उम्मेदवारलाई जिताउन आफू उत्साहित रहेको उहाँ बताउनुहुन्छ।
न्यू पाथीभरा ट्रेडर्सका सञ्चालक मणी निरौला भने उम्मेदवारहरू सबै व्यवसायिक अनुभव बोकेका सक्षम व्यक्ति रहेको धारणा राख्नुहुन्छ। तर अनुभव मात्रै पर्याप्त नभएको उहाँको भनाइ छ। तीन उम्मेदवारमध्ये पनि सबैभन्दा स्पष्ट सोच, निर्णय क्षमता र निष्पक्ष व्यवहार देखाउने उम्मेदवारलाई जिताउनु व्यवसायीहरूको जिम्मेवारी भएको उहाँ बताउनुहुन्छ।
दमकका व्यवसायीहरूको आवाज एउटै छ , अब आउने नेतृत्व भेदभाव गर्ने खालको हुनु हुँदैन। सानो–ठूलो, नयाँ–पुरानो, प्रभावशाली–सामान्य भनेर छुट्याउने प्रवृत्तिको अन्त्य हुनुपर्छ। नियम सबैका लागि समान, निर्णय स्पष्ट र संघ व्यवसायीको समस्या बोकेर उभिने संस्था बन्नुपर्छ।
