दमक,२२ पुस । गत भदौ २३ र २४ गते परिवर्तनका लागी भएको जेन्जी आन्दोलनले देशमा ठूलो चर्चा मात्र होइन, व्यापक विध्वस पनि ल्यायो । देशभर खर्बौं रुपैयाँको क्षति भयो र विकासका केही वर्षले मात्र जुटाएको प्रगति १० वर्षअघि झैँ पछाडि धकेलियो । जेन्जी आन्दोलनपछि गठन भएको नयाँ अन्तरिम सरकारले जनताको मागलाई ध्यानमा राख्दै, फागुन २१ मा प्रतिनिधी सभाको निर्वाचन गर्ने निर्णय गरिसकेको छ । अब आउने आगामी प्रतिनिधी सभा निर्वाचनमा जनता कस्तो नेतृत्व र एजेन्डा चाहन्छन् ?
सर्वसाधारणको दृष्टिमा अबको नेतृत्व स्थिर, पारदर्शी र भ्रष्टाचारमुक्त हुनुपर्छ। युवा रोजगारी, आधारभूत पूर्वाधार, शिक्षा र स्वास्थ्यमा ठोस नीति ल्याउनुपर्ने अपेक्षा सबैको साझा चाहना हो । प्रतिनिधी सभाले आर्थिक विकाससँगै सामाजिक न्याय, समावेशी नीति, कानूनी सुधार र युवा सशक्तिकरणलाई प्राथमिकता दिए मात्रै देशले स्थायी विकास र निकासको मार्ग पाउन सक्छ ।
परिवर्तनका लागी गरिएको जेन्जी आन्दोलनको मूल उद्धेश्य भनेकै भ्रष्टचार रोक्नु थियो । आगामी निर्वाचनमा आउने प्रतिनिधीहरुले देशमा सुशासन कायम गर्ने, भ्रष्टचार न्युनीकरण गर्ने र अधिकांश युवाहरुलाई नै प्रतिनिधीत्व गराएर लैजानुपर्ने बताउनुहुन्छ गौरादह ५ बालुबथानका भिमबहादुर सुवेदी ।
पुरानो पार्टीले यतीका वर्ष देश चलाउँदाको परिणाम देखियो अब भने जेन्जीको बलिदानको सम्मान गर्दै नयाँ दल र जेन्जीहरुलाई नै मौका दिनुपर्ने बताउनुहुन्छ दमक ५का स्थानीय देवी प्रसाद घिमिरे ।
देशमा भर्खरै भएको विध्वंशलाई निकास दिनका लागी अब भने नयाँ सोच भएको नेतृत्वको खाचो औल्याउनुहुन्छ दमकका पर्शुराम लुईटेल । पुराना नयाँ पार्टी भनेर भन्नु भन्दा पनि नयाँ सोच भएको नेतृत्व चुन्न जरुरी छ । पुरानै दल भए नी नयाँ सोच लिएर आए फेरी पुरानालाई नै जिताउनुपर्ने उहाको धारणा छ ।
फागुन २१ को निर्वाचन अब केवल मतको गणना होइन, देशको भविष्य र जनताको विश्वासको परिक्षा बन्नेछ। जसले जनताको आवाज सुन्छ र काममा उतार्छ, त्यसले मात्र आगामी दशकभरको राजनीतिक स्थिरता र विकास सुनिश्चित गर्न सक्छ ।
