दमक, २४ पुष । माघे संक्रान्ती पर्व नजिकिदैँ गर्दा यतिबेला तरकारी बजारहरु विभिन्न प्रकारका तरुलहरुले भरिएका छन् । विशेष गरि यो पर्वमा तरुलको व्यापार अत्याधीक बढ्ने भएकाले व्यापारीहरु पनि यति बेला उत्साहित छन् । मागे संक्रान्ती पर्व नजिकिँदै गर्दा यो वर्ष दमक बजारमा तरुलको व्यापार कस्तो भईरहेको छ त? दमकका व्यापाारीहरु के भन्छन् ।
सब्जी बजारका हरेक पसलमा तरुल राखिएको देखिएपनि तरुल किन्न आउने ग्राहक भने निकै कम देखिन्थे । तरुलको व्यापार ठिकठाक मात्रै भएको तर, अरुबेला जस्तो उत्साहित नभएको व्यावसायीहरुको भनाई छ । केही वर्ष यता हरेक कूराको व्यावसाय घट्दै जाने क्रमको प्रभाव तरुल व्यावसायमा पनि प्रस्टै देखिएको छ ।
आर्थिक मन्दीका कारण हरेक कुराको बजार घटेसँगै तरुलको बजार पनि घटेको व्यापारीहरुको भनाई छ । केही वर्ष यता त्यती उत्साहजनक व्यापार नभएको प्रतिक्रिया दिनुहुन्छ दमक २का तरकारी व्यवसायी पर्शुराम दाहाल ।
तर दमक सब्जी बजारमा सब्जी व्यवसाय गरिरहनुभएका रवीलाल उप्रेतीका अनुसार विगतका वर्षहरुमा जस्तो व्यापार थियो अहिले पनि त्यस्तै व्यापार भईरहेको छ । उहाँ भन्नुहुन्छ न त तरुलको बजार बढेको छ न त घटेको छ , विगतका वर्षहरुमा पनि ठिकठिकै व्यापार हुन्थ्यो अहिले पनि त्यस्तै हुन्छ ।
माघ नजिकिदै गर्दा पेल्टीमारी, ईलामबाट तरुल भित्रिरहेका छन् । अहिले व्यावसाय ठिकठिकै मात्र भएपनि माघ लागे सगैँ व्यापार बढ्ने आशमा हुनुहुन्छ कल्याणी राजवंशी । मागे संक्रान्ती आाउन केही दिन मात्र बाँकी रहँदा पनि यो वर्ष तरुलको व्यवसाय त्यस्तो उत्साहजनक देखिएको छैन । त्यही पनि व्यवसायीहरु माघमा भने राम्रो व्यापार हुने आशमा छन् ।
