पथरी, २५ पुस / नेपालको ठूलो इन्टरनेट सेवा प्रदायक तथा देशकै अग्रणी आइसीटी कम्पनी वर्ल्डलिंक कम्युनिकेसन्स लिमिटेडले आफ्ना कर्मचारीकासाथै सडकमा यात्रारतहरुका लागि सडक सुरक्षा र ट्राफिक नियमहरूका बारेमा प्रशिक्षित गर्न एक विशेष कार्यक्रम अघि बढाएको छ ।
उर्लाबारी प्रहरी र उर्लाबारी ट्राफिक प्रहरीको प्राविधिक सहयोगमा उर्लाबारीबाट सुरु गरिएको कार्यक्रममा वर्ल्डलिंक कम्युनिकेसन्समा कार्यरत करिव ४० जना कर्मचारीसहित स्थानीयको सहभागिता रहेको थियो ।
कार्यक्रममा ट्राफिक नियमहरू, सडक संकेतहरू, हेल्मेट र सिट बेल्टको अनिवार्य प्रयोग, मादक पदार्थ सेवन गरेर सवारी नचलाउने, गति नियन्त्रण तथा पैदलयात्रीको सुरक्षाजस्ता विषयहरूमा जानकारी प्रदान गरिएको थियो । साथै, सडक दुर्घटनाबाट हुने जोखिम र त्यसका असरहरूबारे व्यावहारिक उदाहरणमार्फत सचेत गराइएको थियो ।
कर्मचारीहरूमा सुरक्षित सवारी संस्कार विकास गर्नु र कार्यस्थल तथा दैनिक जीवनमा ट्राफिक नियमको पालना सुनिश्चित गर्नु कार्यक्रमको मुख्य लक्ष्य हो । यस किसिमको कार्यक्रमले कर्मचारीहरूलाई मात्र नभई उनीहरूको परिवार र समाजसम्म सकारात्मक सन्देश प्रवाह गर्ने अपेक्षा गरिएको छ । वर्ल्डलिंक कम्युनिकेसन्स लिमिटेडले भविष्यमा पनि यस्ता सामाजिक उत्तरदायित्वसम्बन्धी कार्यक्रमहरू प्रदेशका पालिकाहरुमा निरन्तर सञ्चालन गर्ने वर्ल्डलिंक कोशी प्रदेशका क्षेत्रीय जनसम्पर्क प्रबन्धक राजन तिम्सिनाले जानकारी दिनु भयो ।
