दमक,३ माघ । निर्वाचन आयोग नेपालको मातहतमा प्रतिनिधि सभा सदस्य निर्वाचन २०८२ का लागि झापा क्षेत्र नम्बर ५ मा निर्वाचन अधिकृतको कार्यालय स्थापना गरिएको छ । कोशी प्रदेश, झापा जिल्ला अन्तर्गत दमक–८ मा रहेको अर्गानिक कृषी बजारको खाली भवनमा स्थापना गरिएको उक्त कार्यालयबाट निर्वाचनसम्बन्धी सम्पूर्ण काम कारबाही अगाडि बढाइएको छ ।
झापा क्षेत्र नम्बर ५ मा निर्वाचन अधिकृत बिदुर कार्कीको नेतृत्वमा ९ जना कर्मचारी खटिएका छन् । कार्यालयमा एक जना मुख्य निर्वाचन अधिकृत, एक जना सहायक निर्वाचन अधिकृत, नासु वा खरिदार सरहका एक जना कर्मचारी, एक जना कम्प्युटर अपरेटर, दुई जना कार्यालय सहयोगी, एक जना सवारी चालक तथा एक जना पिएसओ कार्यरत रहेका छन्।
निर्वाचन प्रयोजनका लागि यस क्षेत्रमा ६१ वटा मतदान स्थल र १ सय ८५ वटा मतदान केन्द्र तोकिएका छन् । निर्वाचन कार्यालयका अनुसार झापा क्षेत्र नम्बर ५ मा कुल १ लाख ६३ हजार ३ सय ७९ जना मतदाता रहेका छन् ।
निर्वाचनलाई स्वच्छ, निष्पक्ष र व्यवस्थित रूपमा सम्पन्न गर्न आवश्यक प्रशासनिक तथा प्राविधिक तयारी तीव्र रूपमा अघि बढाइएको निर्वाचन अधिकृतको कार्यालयले जनाएको छ । कार्यलयको शुभारम्मसगैँ कार्यलयलाई व्यवस्थीत गर्ने कार्य सुरु गरिसकेको बताउनुहुन्छ क्षेत्र नं ५का निर्वाचन कार्यलय अधिकृत बिदुर कार्की । निर्वाचनलाई सफल पार्ने प्रतिबद्धता निर्वाचन अधिकृतको कार्यालयले जनाएको छ ।
