मोरङ ,२८ माघ । मोरङ क्षेत्र नं. १ मा आसन्न प्रतिनिधिसभा निर्वाचनको सन्दर्भमा उम्मेदवार तथा प्रतिनिधिहरूबीच छलफल तथा अन्तरक्रिया कार्यक्रम सम्पन्न भएको छ।
कार्यक्रममा प्रतिनिधिसभा सदस्य पदका उम्मेदवारहरू, निर्वाचन प्रतिनिधि, मुख्य निर्वाचन अधिकृत, प्रमुख जिल्ला अधिकारी, निर्वाचन आचारसंहिता अधिकृत, विभिन्न सुरक्षा निकायका प्रमुख तथा सञ्चारकर्मीहरूको सहभागिता रहेको थियो।
कार्यक्रममा आगामी प्रतिनिधिसभा निर्वाचन २०८२ लाई स्वच्छ, स्वतन्त्र, निष्पक्ष, भय तथा दबाबरहित वातावरणमा सम्पन्न गर्न सबै उम्मेदवार, राजनीतिक दल तथा तिनका भ्रातृ संगठन, कर्मचारी, नागरिक समाज, सञ्चारकर्मी र आम सर्वसाधारणले निर्वाचन आचारसंहिता पालना गर्ने प्रतिबद्धता व्यक्त गरेका छन्
निर्वाचन सन्दर्भमा निर्वाचन आचारसंहिता अनुगमन समिति तथा मुख्य निर्वाचन अधिकृतको कार्यालय, मोरङले आचारसंहिताबारे स्पष्ट जानकारी गराएको थियो।
मुख्य निर्वाचन अधिकृत प्रकाश घिमिरेको अध्यक्षतामा सम्पन्न सर्वपक्षीय बैठकमा प्रमुख जिल्ला अधिकारी युवराज कट्टेललगायत सहभागीहरूले आ–आफ्ना धारणा राखेका थिए। बैठकमा मुख्य निर्वाचन अधिकृतको कार्यालय, मोरङका प्रमुख चित्रबहादुर गुरुङ प्रमुख अतिथिका रूपमा उपस्थित थिए।
सर्वपक्षीय बैठकमा मोरङका प्रमुख सेनानी शिवदल गणका प्रमुख सेनानी अपनल बस्नेत, जिल्ला प्रहरी कार्यालय मोरङका प्रहरी उपरीक्षक कवित कटुवाल, सशस्त्र प्रहरी उपरीक्षक गेहेन्द्र ब. भण्डारी, उर्लाबारी नगरपालिकाकी उपप्रमुख मिना देवी खतिवडा (पौडेल), लेटाङ नगरपालिकाका मेयर भूपेन्द्र कुमार लावती, मिक्लाजुङ गाउँपालिकाका प्रमुख विवि कुमार राई, केरावारी गाउँपालिकाका प्रमुख सुमन मिरिङ्चिङ लगायतको उल्लेखनीय उपस्थिति रहेको थियो।
