दमक/
झापापको दमक नगरपालिकामा शनिबारबाट हात्ती पाइले बिरुद्धको औषधि सेवन अभियान सुरु भएको छ । नगर प्रमुख रोमनाथ ओलीले औषधि सेवन गरि यो वर्षको अभियान सुरु गरिएको हो ।
यस प्रकारको अभियान हरेक वर्ष चल्छ । अभियानको उद्धघाटन दमकका प्रतिष्ठत व्यक्तिबाटै गराइन्छ । तर यो अभियानले ११ वर्ष सम्म दमकमा सफलता प्राप्त गर्न सकेको छैन । न्यूनतम ६ पटक अर्थात ६ वर्ष सम्म नियमती सबैले औषधि सेवन गर्ने हो भने यसको जोखिम कम हुने यस सम्बन्धीका जानकारहरु बताउँछन् । यद्यपी दमकमा भने ६ पटक मात्रै होईन यो वर्ष सहित गरेर एघार वर्ष सम्म औषधि खुवाउने अभियान चलीरहेको छ । अर्थात विगत ५ वर्ष देखी दमकमा यो अभियान बिफल हुँदै छ ।
यो पटकपनि हरेक टोल , विद्यालय स्तर सम्मै पुगेर आम नागरिकलाई औषधि खुवाउने अभियान सुरु भएको छ । यो अभियान चैत्र ७ गते सम्म सञ्चालन हुने दमक नगरपाकिलाको स्वास्थ्य शाखाका कुबेर भट्टराईले जानकारी दिनुभयो ।
जिल्लाभर अभियान सुरु
यस वर्ष झापामा साढे आठ लाखलाई हात्तीपाइलेविरुद्धको औषधि सेवन गराइँदै छ । स्वास्थ्य कार्यालय झापाका फोकल पर्सन जीवन चम्लागाईंले जिल्लामा नौ लाख ३५ जनामध्ये आठ लाख ४३ हजारलाई औषधि सेवन गराइने जानकारी दिनुभयो ।
प्रदेश नं १ मा झापा र मोरङमा मात्र यो अभियान सुरु भएको छ । झापामा दुई प्रकारका र मोरङमा तीन प्रकारका औषधि सेवन गराइने फोकल पर्सन चम्लागाईंले बताए ।
अभियानअन्तर्गत स्वास्थ्यकर्मी र स्वयम्सेवक छ/छ सय परिचालन गरिएको छ भने उनीहरुमार्फत हात्तीपाइले रोगविरुद्धको औषधि (डीइसी) २० लाख ७२ हजार १४ डोज र एल्बेन्डाजोल नौ लाख २० हजार ८९५ डोज वितरण गरिनेछ । औषधि खुवाउने बेलामा छुटेका तथा रोगी व्यक्ति रोग निको भएपछि सम्बन्धित स्वास्थ्य संस्थामा गई औषधि सेवन गर्न सक्नेछन् । स्वास्थ्य कार्यालय झापाका प्रमुख योगराज घिमिरेले सरकारले हात्तीपाइले रोग निवारणका लागि बर्सेनि ठूलो धनराशि खर्चिदै बताउनु भयो ।
झापामा हात्तीपाइले रोगविरुद्धको औषधि सेवन दर पनि बढ्दै गएको छ । सन् २०१२ देखि हात्तीपाइले रोगविरुद्धको अभियान सुरु भएयता औषधि सेवन दर बढ्नुका साथै रोगीको सङ्ख्यामा पनि कमी आएको छ । झापामा २०१२ मा जिल्लामा ५५.५९ प्रतिशतले औषधि सेवन गरेका थिए भने २०२१ मा ८५ प्रतिशतले औषधि सेवन गरेको स्वास्थ्य कार्यालय झापाको तथ्याङ्क छ ।
स्वास्थ्य कार्यालय झापाले औषधि सेवनलाई शतप्रतिशतमा पुर्याउन लक्ष्य लिएको छ । चालु आर्थिक वर्ष २०७८/०७९ मा २९२ मा हात्तीपाइलेका नयाँ रोगी फेला परेका छन् । जसमा हाइड्रोसिल १४६, खुट्टा सुन्निएका १४० र हात र स्तन सुन्निएका छ जना रहेका छन् । गत आव २०७६/०७७ मा जिल्लामा ३५१ मा हात्तीपाइले देखिएको छ । झापामा २४ प्रतिशत सङ्क्रमण दर रहेकोमा अहिले घटेर २.३३ जनामा झरेको छ । हात्तीपाइले लामखुट्टेको टोकाइबाट सर्ने रोग हो । यसले हातखुट्टा सुनिने, अण्डकोष सुनिने गर्दछ ।
