बिर्तामोड, चैत २४ । कोशी पर्यटन वर्ष २०८२ अन्तर्गत झापाको बिर्तामोडमा कोशी–बङ्गाल सांस्कृतिक तथा पर्यटन उत्सव २०८२ सुरु भएको छ । मनदेखि मन जोड्ने उद्देश्यले आयोजित महोत्सवमा हस्तकलाका सामग्री आकर्षणको केन्द्र बनेका छन् । त्यसमा पनि झापाको भद्रपुर–८ का हस्तकला व्यवसायी निर्मल शाक्यले बाँसको जराबाट बनाएका हस्तकलाका सामग्री आकर्षक बनेका छन् । उहाँले विभिन्न धार्मिक तथा सजावटी सामग्री निर्माण गर्दै आँउनु भएको छ। करिब १५ वर्षदेखि उहाँले प्राकृतिक रूपमा पाइने बाँसको जरालाई प्रयोग गरी हस्तकलाका आकर्षक सामग्री तयार पार्दै आउनु भएको छ।
बाँसको जरालाई सफा गरेर, सुकाएर र त्यसलाई हातैले कुँदेर उनले भगवान गौतम बुद्ध, गणेश लगायत विभिन्न आकृतिका मूर्तिहरू, चराचुरुङ्गी तथा घर सजावटका सामग्री निर्माण गरेका छन् । पूर्ण रूपमा हातैले तयार गरिने यी सामग्रीहरू हेर्दा आकर्षक मात्र नभई नेपाली मौलिक कला र संस्कृतिको झल्को दिने खालका छन् ।
शाक्यले निर्माण गरेका सामग्रीहरूमा विभिन्न चराहरू, जनावरहरू, धार्मिक मूर्तिहरू तथा सजावटी आकृतिहरू समावेश छन् । बाँसको जराको प्राकृतिक आकारलाई नै उपयोग गरेर कलात्मक रूपमा कुँद्ने भएकाले प्रत्येक सामग्री फरकफरक र विशेष देखिने गर्दछ । यही कारणले यस्ता हस्तनिर्मित सामग्रीहरू स्थानीय मात्र होइन बाहिरी आगन्तुकका लागि पनि विशेष आकर्षण बन्ने गरेका छन् ।
हाल उहाँले आफ्ना हस्तकलाका सामग्रीहरू आजदेखि सुरु भएको दुई दिने कोशी–बंगाल सांस्कृतिक तथा पर्यटन महोत्सवमा प्रदर्शनका लागि ल्याउनु भएको छ । झापाको बिर्तामोडस्थित सिटी सेन्टरमा सञ्चालन भइरहेको उक्त कार्यक्रममा नेपाल र भारतबाट आएका पर्यटक तथा अतिथिहरूलाई उहाँले आफ्ना सामग्रीहरू देखाउँदै बिक्री वितरण समेत गरिरहेका छन् ।
कार्यक्रममा सहभागी भएका धेरै आगन्तुकहरूले बाँसको जराबाट बनेका यस्ता अनौठा र कलात्मक सामग्रीप्रति चासो देखाइरहेका छन् । धेरैले सामग्री नजिकबाट हेर्ने, त्यसबारे जानकारी लिने तथा किन्ने समेत गरिरहेको शाक्यले बताउनु भयो ।
उहाँका अनुसार बाँसको जराबाट सामग्री बनाउन समय, धैर्य र सीप आवश्यक हुन्छ । एउटा सामग्री तयार गर्न कहिलेकाहीँ धेरै समय लाग्ने गर्दछ । तर, मेहनत र लगनशीलताले गर्दा यो कामलाई उहाँले निरन्तरता दिँदै आँउनु भएको छ ।
स्थानीयस्तरमै उत्पादन गरिने यस्ता हस्तकलाका सामग्रीहरूले नेपाली कला, संस्कृति र पहिचानलाई जोगाउन महत्वपूर्ण भूमिका खेल्ने विश्वास गरिएको छ । साथै, यस्ता कामले स्थानीय सीपलाई जगेर्ना गर्नुका साथै आयआर्जनको माध्यम पनि बन्ने गरेको छ ।
स्थानीयस्तरमा उत्पादन हुने यस्ता हस्तकलालाई राज्य तथा सम्बन्धित निकायले प्रवद्र्धन गरेमा नेपाली हस्तकलाले अझ व्यापक पहिचान पाउने अपेक्षा गरिएको छ । उहाँले निर्माण गरेका सामग्री आकर्षकको केन्द्र बनेको थियो ।
