दमक,२६ वैशाख।ढोलको तालसँगै झ्याम्टाको घन्काइ मिसिँदा दीपिनी आधारभूत विद्यालयको प्राङ्गण एकैछिनमा उत्सवमय बन्यो। रंगीन पहिरन र गहनामा सजिएका युवायुवतीको घेरामा सुरु भएको साकेला नृत्यले दमक–५ मा साकेला उभौलीको रौनक झल्काइरहेको थियो। शनिबार किरात राई यायोक्खा दमक–५ को आयोजनामा सम्पन्न कार्यक्रममा दमक–५ र दमक–९ समितिका युवाहरूले परम्परागत सिली नृत्य प्रस्तुत गरे, जहाँ ढोल, झ्याम्टा र च्याब्रुङको तालसँगै किराती संस्कृतिको जीवन्त झलक देखियो।
साकेला उभौली किरात समुदायको प्रकृतिसँग जोडिएको महत्वपूर्ण पर्व हो। उभौली अर्थात् उकालो लाग्ने समय, जब खेतीपाती सुरु हुन्छ। यस अवसरमा उभौली पूजा गर्दै प्रकृति, भूमि र पूर्वजप्रति कृतज्ञता व्यक्त गरिन्छ। साकेला नृत्यमा सहभागीले दौरा–सुरुवाल, फेटा, हाकुपटासी, मेखला, पछ्यौरा जस्ता पहिरन तथा सुन–चाँदीका परम्परागत गहना लगाउने चलन छ। सिली नृत्यका प्रत्येक चालले खेती, बाली, चराचुरुङ्गी र प्रकृतिसँगको सम्बन्ध रहेको हुन्छ ।
कार्यक्रमका प्रमुख अतिथि दमक नगरपालिकाका प्रमुख रामकुमार थापाले साकेला उभौलीको शुभकामना दिँदै दमकमा बसोबास गर्ने २१ जाति समुदायबीच एकता मजबुत बनाउने यस्ता कार्यक्रमको प्रशंसा गर्नुभयो। “आफ्नो संस्कृति पुस्तान्तरण गर्दै संरक्षण गर्ने कार्य सराहनीय छ। दमक नगरपालिकाले यसको संवद्र्धनका लागि आवश्यक सहयोग गर्न तयार छ,” उहाँले प्रतिबद्धता व्यक्त गर्नुभयो।
कार्यक्रमकै अवसरमा किरात समुदायकी महिला रोग विशेषज्ञ डा. सिता राईलाई दोसल्ला ओढाएर सम्मानपत्रसहित सम्मान गरियो। सम्मान ग्रहण गर्दै उहाँले यो उपलब्धि आफ्नो मात्र नभई परिवारको त्याग र संघर्षको परिणाम भएको बताउँदै आयोजकप्रति आभार व्यक्त गर्नुभयो।
नृत्य, सम्मान र शुभकामनाबीच सम्पन्न कार्यक्रमले साकेला उभौलीलाई केवल पर्व मात्र नभई पहिचान, एकता र सांस्कृतिक गर्वको उत्सवका रूपमा प्रस्तुत गरिएको थियो ।
