दमक, १२ जेष्ठ | गएराति वर्षासँगै आएको तीव्र हावाहुरीका कारण झापाका गौरादह, हल्दिबारी, दमक, बिर्तामोड तथा मेचीनगर क्षेत्रमा व्यापक भौतिक क्षति पुगेको छ ।
विभिन्न स्थानमा घरका छाना उड्नुका साथै विद्युत पोल ढल्दा सडक अवरुद्ध भएका छन् । यद्यपि घटनामा मानवीय क्षति भने नभएको प्रहरीले जनाएको छ ।गौरादह नगरपालिका–७ डाँडागाउँमा पर्शुराम दाहालले सञ्चालन गरेको कुखुरा फार्म पूर्ण रूपमा क्षतिग्रस्त भएको छ । हावाहुरीका कारण फार्ममा रहेका २५ वटा ब्रोइलर कुखुरा मरेका छन् । घटनाबाट करिब दुई लाख रुपैयाँ बराबरको क्षति भएको जनाइएको छ ।
हल्दिबारी गाउँपालिका–२ मा तीन परिवारका घरको छाना उड्दा करिब ९० हजार रुपैयाँ बराबरको क्षति भएको छ । चरण बास्के, फुलकुमारी केरुङ र सुदला राजवंशीका घरमा क्षति पुगेको प्रहरीले जनाएको छ ।
यस्तै गौरादह नगरपालिका–६ मा श्यामलाल बैसरा र हुकुम सिंह राईका घरको छाना उड्दा क्रमशः ७० हजार र ६० हजार रुपैयाँ बराबरको क्षति भएको छ । आरतीनगरका मानबहादुर पराजुलीको भान्सा घरमा समेत क्षति पुगेको छ । भान्साघरको छाना उडेर धान र मकै भिज्दा करिब ८० हजार रुपैयाँ बराबरको नोक्सानी भएको छ ।
हल्दिबारी गाउँपालिका–५ मा पूर्णमाया पनेरु चापागाईंको घरको टिनको छाना उड्दा २० हजार रुपैयाँ बराबरको क्षति भएको छ ।
यसैबीच गौरादह नगरपालिका–८ बैराती टोलमा चट्याङ पर्दा इन्द्रमणि प्रसाईका दुई वटा घरमा आगलागी भएको छ । आगलागीबाट टेलिभिजन, फ्रिज, सोलार, विद्युत मिटर, पंखा लगायतका सामग्री जलेर करिब एक लाख ३६ हजार पाँच सय रुपैयाँ बराबरको क्षति भएको प्रहरीले जनाएको छ ।
दमक नगरपालिका–१० मा गुणराज थापाले सञ्चालन गरेको गरिमा इँट्टा भट्टाको भवनको छाना समेत हावाहुरीले उखेलेर पल्टाएको छ ।
बिर्तामोडका विभिन्न स्थानमा बिजुलीका पोल ढल्दा सडक अवरुद्ध भएका छन् । बिर्तामोड–३ मा रुख ढलेर एक घरमा आंशिक क्षति पुगेको छ भने स्थानीयले रुख काटेर सडक खुलाएका छन् ।
बाह्रदशी गाउँपालिका–५ मा पृथ्वीलाल राजवंशीको घरको छाना पूर्ण रूपमा उड्दा करिब एक लाख ५० हजार रुपैयाँ बराबरको क्षति भएको छ ।
मेचीनगर–१५ मा रहेको जय माँ कामाक्ष इण्डष्ट्रिज प्रालिको गोदामको छाना उड्दा तीन लाख रुपैयाँ बराबरको क्षति पुगेको छ । त्यस्तै मेचीनगर–८ मा सूर्यदय कम्पनीको पार्किङ भवनको छाना उडेर दुई वटा बसको अगाडिको सिसा फुटेको छ ।
प्रहरीका अनुसार सबै प्रभावित क्षेत्रमा स्थानीय तह, प्रहरी र सरोकारवाला निकायले क्षतिको थप विवरण संकलन तथा आवश्यक सहयोगको काम अघि बढाइरहेका छन् ।
