सुनसरी/ बीपी कोइराला स्वास्थ्य विज्ञान प्रतिष्ठान धरानमा आउँदो चैत १५ गते देखि स्वास्थ्य बिमा गरेकाले स्वास्थ्य बिमाबाट सेवा लिन नपाउने भएका छन् ।
प्रतिष्ठानका उपकुलपति डा. ज्ञानेन्द्र गिरीले आज एक सूचना जारी गरी सरकारले बिमितहरुले सेवा लिए बापतको रकम भुक्तानी नदिएको कारण प्रतिष्ठान सञ्चालनमा समेत समस्या भएको भन्दै स्वास्थ्य बिमा गर्ने बिमितहरुलाई स्वास्थ्य बिमाबाट सेवा प्रवाह गर्न नसक्ने जनाएका छन् । नेपाल सरकार, स्वास्थ्य बिमा बोर्डबाट बिमा गरेका बिमितहरुलाई प्रतिष्ठानले २०७४ साउन महिनादेखि गुणस्तरीय स्वास्थ्य सेवा प्रदान गर्दै आइरहेको थियो ।
स्वास्थ्य सेवा दिए बापत दाबी गरे अनुसारको सम्पूर्ण रकम सोधभर्ना उपलब्ध गराउन लगायत स्वास्थ्य बिमाको कार्यक्रम सञ्चालन गर्दा देखिएका प्राविधिक तथा अन्य समस्याहरूको सहजीकरण गर्न विभिन्न समयमा स्वास्थ्य बिमा बोर्ड लगायत अन्य सरोकारवालालाई पटक–पटक लिखित अनुरोध गर्दा पनि हालसम्म समस्याहरूको समाधान हुन नसक्दा प्रतिष्ठान आर्थिक सङ्कटबाट गुज्रिरहेको सूचनामा उल्लेख छ ।
प्रतिष्ठानले पुर्याएको सेवा बापत प्राप्त गर्नुपर्ने रकम समयमा नै प्राप्त हुन नसक्दा शिक्षक तथा कर्मचारीहरूको नियमित पारिश्रमिक लगायत दैनिक सञ्चालन खर्चमा समेत प्रतिकुल प्रभाव पर्न गएको छ ।
