झापा ,१४ जेठ। झापाको गौरादह नगरपालिका–७ फगेटीमा स्कुल बसको कथित लापरबाहीले ४ वर्षीय बालकको ज्यान गएको दर्दनाक घटना सार्वजनिक भएको छ । बुधबार साँझ करिब ५ बजे सर्जक एकता बोर्डिङ स्कुलको को १ ख ६९४० नम्बरको बसले आफ्नै विद्यालयमा अध्ययनरत बालक आरोग्य चिमरियालाई घरमा ओराल्ने क्रममा किच्दा घटनास्थलमै मृत्यु भएको हो ।
मृत्यु हुने बालक गौरादह–७ निवासी खड्ग चिमरियाका ४ वर्षीय छोरा आरोग्य चिमरिया हुन् । एउटा अभिभावकले उज्यालो भविष्यको सपना देखेर स्कुल पठाएको छोरा, घरको ढोकामै स्कुल बसको चपेटामा परेर सधैंका लागि बिदा भएपछि परिवार शोकमा डुबेको छ ।
प्रहरीका अनुसार बालकलाई बसबाट ओराल्ने क्रममा सावधानी नअपनाउँदा दुर्घटना भएको प्रारम्भिक अनुसन्धानबाट खुलेको छ । दुर्घटनापछि बस र चालक गौरादह–७ निवासी ५७ वर्षीय लालबहादुर बस्नेतलाई इलाका प्रहरी कार्यालय गौरीगञ्जले नियन्त्रणमा लिएको छ । शवलाई कानुनी प्रक्रिया पूरा गरी पोस्टमार्टमका लागि दमक अस्पताल पठाइएको प्रहरीले जनाएको छ ।
