Search
Close this search box.

स्थानीय तह निर्वाचनको तयारी तीव्र, झापामा २८६ मतदान स्थल निश्चित

 

 

झापा /

झापामा २८६ मतदान स्थल निश्चित भएको जिल्ला निर्वाचन कार्यालय झापाले जनाएको छ । निर्वाचन कार्यालयका निर्वाचन अधिकारी तुलसीकुमार नेपालका अनुसार करिब ७६० मतदान केन्द्रहरू हुने अनुमान गरिएको छ । मतदान स्थल र केन्द्रहरूको अध्ययन,अवलोकन गर्ने काम सम्पन्न भइसकेको छ ।

०७९ बैशाख ३० गते हुने स्थानीय तहको निर्वाचनका लागि जिल्लामा आवश्यक तयारी गरिरहेको नेपालले जानकारी दिए । चैत १३ मतदाताको अन्तिम नामावली प्रकाशन भएपछि मतदान केन्द्रहरू निश्चित हुने उनको भनाई छ ।

जिल्ला निर्वाचन कार्यालय झापाले निर्वाचनको आवश्यक कामलाई निरन्तर रुपमा अघि बढाइरहेको छ । निर्वाचन अधिकारी नेपालका अनुसार मतदाता नामावली अद्यावधिकको काम समेत सम्पन्न भइसकेको छ । नेपालले भने, बसाइसराइ गएका , आएका, मृत्यु भएका र विवाह गरी गएका–आएका मतदाताको नामावली अद्यावधिक गरिन्छ । सो अद्यावधिक गरिएको नामावली नै अन्तिम हुने भनाई छ ।

निर्वाचन आयोगले जिल्लालाई बैशाख ३० गतेका लागि आवश्यक सामग्री पठाएको छ । पठाउन बाँकी सामग्री पनि केही समयमै आइपुग्ने निर्वाचन कार्यालय झापाले जनाएको छ । जिल्लामै खरिद गर्नुपर्ने सामग्री यही खरिद गरिनेछ, नेपालले भने ।

निर्वाचनका लागि आवश्यक सामग्रीहरू मतदान केन्द्रहरूमा बैशाख २७ गते पठाइने छ । निर्वाचन आयोगको योजना अनुसार तीन दिनअघि मात्रै सामग्री पठाइने नेपालको भनाई छ । यस्तै, बैशाख ८ गते झापाका १५ पालिकामा निर्वाचन अधिकृतको कार्यालय स्थापना गरिने बताइएको छ ।

बैशाख ११ देखि १७ गतेसम्म निर्वाचन कार्यक्रम अन्तर्गत मनोनयन, उम्मेद्वारहरुको नामावली प्रकाशन, दाबी विरोध, छानबिनपछिको अन्तिम नामावली प्रकाशन, उम्मेदवारलाई चुनाव चिन्ह प्रदान गर्ने कार्यालयले जनाएको छ ।

जिल्लामा स्थानीय तह निर्वाचनको लागि राष्ट्रिय ६ दलसहित ३६ दल दर्ता भइसकेका छन् । यस्तै, निर्वाचन लक्षित सुरक्षाका लागि जिल्ला प्रशासन कार्यालय झापाले योजना कार्यान्वयन गरिरहेको बुझिएको छ । झापामा ६ लाख ५० हजार २ सय ५८ मतदाता सङ्ख्या रहेको छ । त्यसमा अन्य ९ जना रहेका छन् ।

 

Share:

Facebook
Twitter
Email
WhatsApp