काठमान्डौं, जेठ २६ ।राष्ट्रिय स्वतन्त्र पार्टी (रास्वपा) पहिलो महाधिवेशनको तयारीमा रहे पनि देशभर संगठनभित्र ठूलो विवाद देखिएको छ। वडा, पालिका र जिल्लास्तरमा नेतृत्व चयन, टिकट वितरण र आर्थिक लेनदेनका आरोप–प्रत्यारोपका कारण कुटाकुटसम्मको अवस्था पुगेको छ।
बारादेखि पर्सा, रौतहट, सुनसरीलगायत जिल्लामा अधिवेशन बिथोलिँदा पार्टीभित्र पुराना र नयाँ कार्यकर्ता, साथै सांसद र स्थानीय नेताबीच गम्भीर मनमुटाव देखिएको छ। कतिपय स्थानमा अधिवेशन नै बिना प्रक्रिया सम्पन्न भएको वा रोकिएको आरोप छ।
यसैबीच पार्टीले अनुशासनको नाममा केही नेतामाथि कारबाही गरेपछि विवाद झनै चर्किएको छ र असन्तुष्ट कार्यकर्ताहरू अन्य दलतर्फ जाने क्रम पनि बढेको छ।
विश्लेषकका अनुसार, लोकप्रियताका आधारमा तीव्र रूपमा बढेको रास्वपा अब संगठन, अनुशासन र आन्तरिक लोकतन्त्रको ठूलो परीक्षामा छ। महाधिवेशनपछि पार्टीको भविष्यको दिशा स्पष्ट हुने अपेक्षा गरिएको छ।
