दमक, ८ साउन । दमक नगरपालिकाभित्र निर्माणाधीन सडक तथा ढल व्यवस्थापन आयोजनाहरू लामो समयदेखि अलपत्र परेपछि दमक नगरपालिकाका नगरप्रमुख रामकुमार थापाले सम्बन्धित निकायलाई पटक–पटक पत्राचार गर्दै आउनु भएको छ। तर, नगरपालिकाको आग्रह र पटक–पटकको पत्राचारपछि पनि निर्माण तथा मर्मतको काम अघि नबढेपछि स्थानीय सरकारको आग्रहलाई सम्बन्धित निकायले नै बेवास्ता गरेको हो कि भन्ने प्रश्न उठेको छ ।
नगरप्रमुख थापाले खानेपानी तथा ढल व्यवस्थापन विभाग, पानीपोखरी काठमाडौंलाई पठाएको पत्रमा दमक नगरपालिका क्षेत्रभित्र संघीय खानेपानी तथा ढल व्यवस्थापन आयोजना अन्तर्गत विराटनगरबाट ठेक्का प्रक्रिया मार्फत सम्झौता भई निर्माण भइरहेका विभिन्न आयोजना लामो समयदेखि अधुरो अवस्थामा छाडिएको उल्लेख गर्नुभएको छ ।
नगरपालिकाका अनुसार निर्माण कार्यमा तीव्रता दिन र आयोजना समयमै सम्पन्न गर्न पटक–पटक पत्राचार गरिए पनि अपेक्षित प्रगति हुन सकेको छैन । नगरपालिकाले आयोजना निर्माणका क्रममा खनिएका सडक तथा अन्य संरचनाहरूको मर्मत सम्भार गर्नसमेत आग्रह गर्दै आएको छ ।
अधुरा आयोजना र बिग्रिएका सडकका कारण नागरिकको दैनिक आवागमन प्रभावित हुनुका साथै दुर्घटनाको जोखिम समेत बढेको नगरपालिकाको भनाइ छ । आयोजना सम्पन्न नभएसम्म सडक मर्मत गर्न नमिल्ने अवस्था रहेको भन्दै नगरपालिकाले समस्या समाधानका लागि गम्भीरतापूर्वक पहल गरिदिन खानेपानी तथा ढल व्यवस्थापन विभागसँग आग्रह गरेको छ ।
नगरप्रमुख थापाले आयोजना निर्माणसँगै सडक मर्मतसम्भारको काम अघि बढाउन र नागरिकले भोग्दै आएको समस्या तत्काल समाधान गर्न सम्बन्धित निकायको ध्यानाकर्षण गराउनुभएको हो । दमक नगरपालिकाले यसअघि पनि आयोजना निर्माणमा ढिलाइ भएको भन्दै पटक–पटक पत्राचार र समन्वय गर्दै आएको भए पनि कामले गति लिन नसकेको जनाएको छ ।
