सुनसरी,१२ साउन। देवानगञ्ज गाउँपालिका–३ कसनागञ्जमा भएको घटनापछि उत्पन्न सुरक्षा संवेदनशीलतालाई ध्यानमा राख्दै जिल्ला प्रशासन कार्यालय सुनसरीले विभिन्न क्षेत्रमा निषेधाज्ञा र अनिश्चितकालीन कफ्र्यू आदेश जारी गरेको छ। प्रमुख जिल्ला अधिकारी ईश्वरीप्रसाद अर्यालद्वारा जारी सूचनाअनुसार साउन १२ गते बिहान ७ बजेदेखि साँझ ७ बजेसम्म देवानगञ्ज र हरिनगर गाउँपालिकाका सम्पूर्ण क्षेत्रमा निषेधाज्ञा लागू गरिएको छ। सर्वसाधारणको अन्योल हटाउन पूर्व–पश्चिम राजमार्ग क्षेत्रबाट भने कफ्र्यू हटाइएको प्रशासनले जनाएको छ।
शान्ति–सुरक्षा कायम राख्न देवानगञ्ज र हरिनगरका मुख्य बजार क्षेत्रमा अर्को आदेश नभएसम्मका लागि अनिश्चितकालीन कफ्र्यू जारी गरिएको छ।
कफ्र्यू लागू गरिएका मुख्य बजार क्षेत्रहरूः
हरिनगरा बजार क्षेत्र (इलाका ’क’) : पूर्वमा नुनिला टोल, पश्चिममा पश्चिम खुनिया धार, उत्तरमा हरिनगर गाउँपालिका कार्यालय र दक्षिणमा वसन्तपुर मोड।
भुटाहा बजार क्षेत्र (इलाका ’ख’) : पूर्वमा मोरिया धार खोला, पश्चिममा ईदगाहा फिल्ड, उत्तरमा सुनसरी खोला र दक्षिणमा हरिनगर गाउँपालिका कार्यालय।
कसनागञ्ज बजार क्षेत्र (इलाका ’ग’) :पूर्वमा यादव टोल, पश्चिममा पाँचौँ सिमल मावि, उत्तरमा कृष्ण मावि र दक्षिणमा नेपाल–भारत सीमा।
घुस्की बजार क्षेत्र (इलाका ’घ’) : पूर्वमा कासमिया मदरसा, पश्चिममा घुस्की प्रहरी चौकी, उत्तरमा इशा हार्डवेयर र दक्षिणमा हिलाल पब्लिक स्कुल।
देवानगञ्ज बजार क्षेत्र (इलाका ’ङ’) : पूर्वमा मुसहर टोल (विराटनगर सडक), पश्चिममा मोरिया खोला र उत्तरमा चिउरा मिल।
स्थानीय प्रशासन ऐन, २०२८ बमोजिम जारी गरिएको यस आदेशको पूर्ण पालना गर्न आग्रह गर्दै प्रशासनले तोकिएका क्षेत्रमा कुनै पनि प्रकारको भेला, जुलुस वा प्रदर्शन नगर्न चेतावनी दिएको छ।
