विराटनगर,१२ साउन ।जिल्ला प्रशासन कार्यालय मोरङले जिल्लाभर आयोजना हुने मेला, महोत्सव, विवाह, पार्टी, चाडपर्व, धार्मिक कार्यक्रम तथा पुराण लगायतका कुनै पनि कार्यक्रमहरूमा डिजे बजाउन पूर्ण रूपमा निषेध गरेको छ।
सहायक प्रमुख जिल्ला अधिकारी पवनराज कोइरालाद्वारा जारी सूचना अनुसार अर्को व्यवस्था नभए सम्मका लागि मोरङ जिल्लाभर कुनै पनि स्थानमा डिजेको प्रयोग नगर्न र नगराउन कडा निर्देशन दिइएको छ।
प्रशासनको यो निर्देशनको बेवास्ता वा उल्लंघन गरी कसैले डिजे प्रयोग गरेको वा गराएको पाइएमा प्रचलित कानुन बमोजिम कडा कारबाही गरिने जिल्ला प्रशासन कार्यालयले जनाएको छ। सर्वसाधारणको शान्ति सुरक्षा, स्वास्थ्य र वातावरणमा पर्ने असरलाई ध्यानमा राख्दै यो निर्णय लागू गरिएको हो।
