मधेश,१४ साउन । मधेश मा पछिल्लो समय बिग्रँदै गएको सुरक्षा परिस्थिति र साम्प्रदायिक संवेदनशीलतालाई ध्यानमा राख्दै मधेश केन्द्रित दलका शीर्ष नेताहरू आपत्कालीन छलफलमा जुटेका छन्। राष्ट्रिय मुक्ति पार्टी नेपालको कार्यालयमा जारी बैठकमा मधेशमा देखिएको विद्यमान समस्या समाधानका लागि साझा धारणा तय गर्ने विषयमा गहन संवाद भइरहेको छ।
छलफलमा जनता समाजवादी पार्टी नेपालका संरक्षक महन्त ठाकुर, राष्ट्रिय मुक्ति पार्टीका अध्यक्ष राजेन्द्र महतो, पूर्वमन्त्री लक्ष्मणलाल कर्ण, जनमत पार्टीका वरिष्ठ उपाध्यक्ष जयकान्त राउत तथा संविधानसभा सदस्य रामकुमार शर्मा लगायतका शीर्ष नेताहरूको उपस्थिति रहेको छ।
सुनसरीबाट सुरु भएको हिंसात्मक गतिविधि भड्किँदै जाँदा यतिबेला सम्पूर्ण मधेश क्षेत्र तनावग्रस्त बनेको छ। क्षेत्रमा शान्ति सुरक्षा कायम गर्न र साम्प्रदायिक सद्भाव बिग्रन नदिन दलहरूले कसरी अगाडि बढ्ने भन्नेबारे साझा निष्कर्ष निकाल्ने अपेक्षा गरिएको छ।
