दमक,१९ साउन । पूर्वी नेपालको लाइफलाइन मानिएको पूर्व–पश्चिम एसियन हाइवेअन्तर्गत काँकडभिट्टा–लौकही सडक विस्तार आयोजना बिजुलीका पोल नहट्दा गम्भीर मोडमा पुगेको छ। पोल स्थानान्तरणको जिम्मा पाएको ठेकेदार कम्पनी नै बेपत्ता भएपछि अहिले सडक निर्माणको काम थप सुस्त बनेको छ। नेपाल विद्युत प्राधिकरण विराटनगर मार्फत पोल सार्ने ठेक्का पाएको ’सोहन कन्स्ट्रक्सन’ पछिल्लो १५ दिनदेखि सम्पर्कबाहिर रहेको आयोजना निर्देशनालयले जनाएको छ।
काँकडभिट्टादेखि सितापुरीसम्मको ४५ किलोमिटर खण्डमा करिब ९ सय पोल रहेकामा दुई महिनाको अवधिमा कम्पनीले जम्मा ८० देखि १ सय वटा मात्र पोल सारेको छ। पोल नसारिँदा सडक चौडा बनाउने, नाली खन्ने र कालोपत्रे गर्ने काम पूर्ण रूपमा प्रभावित भएको छ।
एसियाली विकास बैंकको ऋण सहयोगमा कुल छियालीस अर्ब रुपैयाँ लागतमा स्तरोन्नति भइरहेको यो पन्चनवे किलोमिटर सडकलाई ५ वटा प्याकेजमा बाँडेर काम भइरहेको छ। तर, समग्र आयोजनामा हालसम्म करिब ३० प्रतिशत मात्र पोल सारिएका छन। दमक बजार क्षेत्रमा बिजुलीका पोल र खानेपानीका पाइप नहटाउँदा फ्लाइओभर निर्माणको कामसमेत रोकिएको छ। पश्चिम खण्डका आयोजना प्रमुख जगत प्रजापतीका अनुसार सन् २ हजार २७ को जनवरीभित्र काम सक्ने लक्ष्य भए पनि अझै १ हजार ५ सयभन्दा बढी पोल सार्न बाँकी छ।
काँकडभिट्टा–सितापुरी पूर्वी खण्डको १० अर्ब ६ करोडको मुख्य ठेक्का ’एभ्रास्कोन–कालिका जेभी’ ले लिएको छ, जसको हालसम्म ५० प्रतिशत भौतिक प्रगति भएको छ। अनुकूल मौसम भए दशैँअघि बजार क्षेत्रबाहेक अन्य भागमा एकतर्फी कालोपत्रे गर्ने लक्ष्य राखिएको छ। त्यस्तै, निन्दा, बिरिङ र कन्काई नदीमा ३ सय मिटरभन्दा लामा पुल बनाउन ’कोभेक–क्रेजसी–टुन्डी जेभी’ सँग ५ अर्ब सन्तनवे करोडमा सम्झौता भई काम जारी छ। सम्झौताअनुसार २०८० कात्तिकदेखि ३ वर्षभित्र निर्माण सक्नुपर्ने भए पनि पूर्वाधार व्यवस्थापनको ढिलाइले आयोजनाको भविष्य भने अनिश्चित बन्दै गएको छ।
