भद्रपुर, २१ साउन । झापा जिल्ला अदालतमा दुई बर्षको कार्यकाल पूरा गरी प्रमुख न्यायाधीश उमेशप्रसाद लुइटेलको सरूवा भएपछि प्रमुख न्यायाधीशको रुपमा आँउनु भएको प्रकाश राउतलाई स्वागत गरिएको छ ।
प्रमुख न्यायाधीशको रूपमा कार्यभार सम्हाल्न आँउनु भएको राउतलाई झापाका प्रमुख जिल्ला अधिकारी शिवराम गेलाल,न्यायाधीशहरु अम्बिकाप्रसाद दाहाल, पारसमणि पोखरेल, लोकबहादुर हमाल, उषा श्रेष्ठ, नारायण रिमाल, डिल्लीप्रसाद आचार्य, श्रेस्तेदार डिल्लीराम प्रसाई, जिल्ला प्रहरी कार्यालय झापाका प्रमुख, प्रहरी उपरीक्षक बसुन्धरा खड्का, जिल्ला सरकारी वकील कार्यालय झापाका जिल्ला न्यायाधिवक्ता दिपेश प्रताप शाह लगायत अदालतका कर्मचारीहरू समेतले स्वागत गर्नु भएको हो।
प्रशासन शाखाका अनुसार झापा अदालतमा ९ जना न्यायाधीशको दरबन्दी रहेको र सामान्यतया २÷२ बर्षमा न्यायाधीशको सरुवा हुने गरेकोछ। हालै न्याय परिषदले झापा जिल्ला अदालतबाट प्रमुख न्यायाधीश उमेशप्रसाद लुइटेललाई काठमाडौं जिल्ला अदालत, न्यायाधीश महेन्द्रप्रसाद पोखरेललाई पर्सा जिल्ला अदालत र न्यायाधीश ऋतबहादुर पुलामी मगरलाई सिरहा जिल्ला अदालतमा सरूवा गरेको थियो ।
प्रमुख न्यायाधीशमा प्रकाश राउत तथा अन्य न्यायाधीशमा टेकनाथ गौतम र पुण्यप्रसाद सापकोटालाई पठाएसंगै सरूवा भएर आँउनु भएको अर्का न्यायाधीश सापकोटा समेतलाई स्वागत गरिएको अदालतको प्रशासन शाखाका शाखा अधिकृत रामचन्द्र बस्नेतले जानकारी दिनु भएको छ ।
