दमक । २४ साउन । दमकका होटल व्यवसायीले प्रहरीको टिमलाई बोलाएर गम्भीर छलफल गरेका छन्।
दमकमा बढ्दो लागुऔषधको प्रयोग, होटलमा हुन सक्ने गैरकानुनी गतिविधि, विद्यार्थीको आवतजावत र व्यवसाय सञ्चालनको समयलाई लिएर होटल व्यवसायी संघ दमक र इलाका प्रहरी कार्यालय दमकबीच गम्भीर छलफल भएको हो।
होटल व्यवसायीले आफ्ना होटलमा सीसी क्यामेरा जडान गर्ने र होटलमा आउने पाहुनाको पूर्ण अभिलेख राख्ने कुराईलाई कडिकडाउ गर्न प्रहरीले अनुरोध गरेको छ ।
स्कुल तथा कलेजको पोसाकमा आउने विद्यार्थीलाई नास्ता र खाना बाहेक धूम्रपान, मद्यपान वा कोठा उपलब्ध गराएको पाइएमा त्यसको जिम्मेवारी होटल सञ्चालकले समेत लिनुपर्ने इलाका प्रहरी कार्यालय दमकका प्रहरी प्रमुख डि एस पि हरि बस्नेतले अनुरोध गर्नुभयो ।
त्यस्तै, अत्यावश्यक अवस्थाबाहेक तोकिएको समयभन्दा बढी होटल तथा व्यवसाय सञ्चालन नगर्ने विषयमा पनि सहमति भएको छ।
तर होटल व्यवसायीले प्रहरीसमक्ष अर्को विषय पनि उठाएका छन्।
प्रहरीले बिना सूचना होटलमा पुगेर अनावश्यक चेकजाँच नगर्ने सहमति जनाएको छ। व्यवसायीले व्यवसाय सञ्चालनमा सुरक्षा र मर्यादा कायम गर्न आफूहरू तयार रहेको भन्दै अनावश्यक दुःख नदिन प्रहरीसँग आग्रह गरेका होटक व्यवसायी संघका केन्द्रीय सचीव भुपेन्द्र न्यौपानेले जानकारी दिनुभयो ।
छलफलमा कानुनले निषेध गरेका कुनै पनि गतिविधि हुन नदिन दुवै पक्षले सहकार्य गर्ने र त्यस्ता गतिविधि दोहोरिएको पाइएमा कानुनअनुसार कडाइ गर्ने सहमति भएको पनि जनाईएको छ ।
दमकमा बढ्दो लागुऔषध नियन्त्रणका लागि प्रहरीले कुनै कसुर बाँकी नराख्ने प्रतिबद्धता जनाएको छ। साथै, जुन शीर्षकको इजाजत लिएर व्यवसाय सञ्चालन गरिएको हो, त्यही प्रकृतिको व्यवसाय मात्र सञ्चालन गर्न सम्बन्धित व्यवसायीलाई सचेत गराउने सहमति पनि भएको छ।
इलाका प्रहरी कार्यालय दमकमा भएको छलफलमा कार्यालय प्रमुख प्रहरी नायब उपरीक्षक हरि बहादुर बस्नेत, प्रहरी निरीक्षक प्रमोद खड्का लगायत प्रहरी अधिकारी सहभागी थिए।
होटल व्यवसायी संघ दमकका अध्यक्ष योगराज दंगाल, उपाध्यक्षद्वय रुद्र कार्की र डुका कुमाल, महासचिव भूपेन्द्र न्यौपाने, सचिव रमेश दाहालसहित कार्यसमिति सदस्यहरूको सहभागिता थियो।
