सुनसरी — धरानस्थित बीपी कोइराला स्वास्थ्य विज्ञान प्रतिष्ठानले इमर्जेन्सी विभागको स्तरोन्नति गरेको छ । बेड अभावका कारण बिरामीलाई भुइँमा राखेर उपचार गर्दै आएको अस्पतालको इमर्जेन्सी विभागमा दैनिक २ सयदेखि २ सय ५० जना आउने गरेका छन् ।
एक बर्ष अघि ५० बेड क्षमताको इमर्जेन्सी विभागमा २१ बेड थपेर ७१ बनाए पनि बिरामी चाप धान्न सकेको थिएन । प्रतिष्ठानभित्र बाल आकस्मिक कक्ष र स्त्री तथा प्रसूति आकस्मिक कक्ष बेग्लै छन् । प्रतिष्ठानका सहप्रवक्ता डा चूडामणि पोखरेलले ईमर्जेन्सीमा आउनेलाई थप सुलभ र प्रभावकारी ढंगले उपचार सुविधा उपलब्ध गराउन थप २० बेड विस्तार गर्दै नया मेडिकल उपकरण थपिएको बताए । उनले भने, ‘इमर्जेन्सीभित्रका आवश्यक स्थानमा १० थान पेसेन्ट मनिटर पनि जडान गरिएको छ ।’
उनका अनुसार पेसेन्ट मनिटरले अक्सिजन लेभल, इसीजी, मुटुको चाल, श्वासप्रश्वासलगायत मनिटर गर्छ । उक्त मेशिनको जडानले स्वास्थ्य अवस्थाबारे लगातार अनुगमन गरी बिरामीको गुणस्तरिय उपचार गर्न थप सहयोग मिल्ने सहप्रवक्ता डा पोखरेलले बताए ।
सिकिस्तका लागि हाई फ्लो डिभाइस, डेफिब्रिलेटरलगायत उपकरण पनि थप गरिएको छ भने इमर्जेन्सी क्रास कार्ट पनि थप गरिएको उनले बताए । भेन्टिलेटरको आवश्यकता नपर्नेका लागि एचडियु बेड पनि जडान गर्ने तयारी भइरहेको उनले जानकारी दिए ।
