चितवन , १० भदौ | चितवनको देवघाटस्थित बाढी मापन केन्द्रमा नदीको पानीको सतह बढ्दो क्रममा रहेको बाढी पूर्वानुमान महाशाखाले जनाएको छ।
महाशाखाका अनुसार हाल देवघाटमा पानीको सतह ४.७६ मिटर रहेको छ। माथिल्लो क्षेत्रमा आएको बाढीको बहाव करिब दिउँसो ३:३० बजे देवघाट आइपुग्ने अनुमान गरिएको छ।
प्रारम्भिक आकलनअनुसार बाढीको बहावसँगै देवघाटमा पानीको सतहमा करिब ३ मिटरले वृद्धि हुन सक्ने देखिएको छ। यसअनुसार पानीको सतह करिब ८ मिटर पुग्न सक्ने र यो बाढीको पुनरावृत्ति अवधि करिब २ देखि ३ वर्षको हुन सक्ने महाशाखाले जनाएको छ।
महाशाखाको प्रारम्भिक आकलनअनुसार यसबाट चितवन र नवलपरासी क्षेत्रमा ठूलो डुबानको सम्भावना कम रहेको छ। यद्यपि नदीको बहाव अझै बढ्न सक्ने भएकाले सावधानी अपनाउन आग्रह गरिएको छ।
अर्को सूचना जारी नभएसम्म नदी छेउछाउका बस्ती तथा बजारका बासिन्दालाई सुरक्षित र अग्लो स्थानमा रहन बाढी पूर्वानुमान महाशाखाले आग्रह गरेको छ।
