काठमाडौं,८ असोज । नेपाली कांग्रेसको समानान्तर महाधिवेशन गर्ने कार्यतालिका सार्वजनिक गरेको निवर्तमान सभापति शेरबहादुर देउवा समूहले ५५ जिल्लामा संयोजक तोकेको छ।
पूर्वमहामन्त्री डा. शशांक कोइरालाको संयोजकत्वमा गठित महाधिवेशन आयोजक समितिले जिल्ला संयोजक तोकेको हो। डा. कोइरालाले हस्ताक्षर गरेर संयोजकहरूलाई पत्र दिइरहेका छन्।
देउवा समूहले असोज १५ गते वडा अधिवेशन गर्ने र मंसिर २१ देखि २३ गतेसम्म महाधिवेशन गर्ने कार्यतालिका सार्वजनिक गरिसकेको छ।
नेता एनपी साउदका अनुसार कोशी प्रदेशका ८ जिल्लामा संयोजक तोकिएका छन्। पाँचथरमा डेकेन्द्रकुमार तामाङ, झापामा कृष्ण हुमागाई, संखुवासभामा रामकुमार जीसी, भोजपुरमा धर्मराज राई, मोरङमा सुभाष पौडेल, खोटाङमा रोजन राई, ओखलढुंगामा बालगोविन्द राजभण्डारी र उदयपुरमा बसन्त बस्नेत संयोजक बनेका छन्।
मोरङमा विनायक पन्त र उदयपुरमा गोविन्द चाम्लिङलाई सहसंयोजक तोकिएको छ।
यस्तै बागमतीका ११, गण्डकीका ८, लुम्बिनीका १२, कर्णालीका ८ र सुदूरपश्चिमका ८ जिल्लामा पनि संयोजक तोकिएका छन्। मधेस प्रदेशमा भने हालसम्म कुनै जिल्लामा संयोजक तोकिएको छैन।
संयोजकहरूले सम्बन्धित जिल्लामा इतर समूहको तर्फबाट महाधिवेशनका लागि आवश्यक संगठनात्मक काम अघि बढाउने बताइएको छ।
