दमक, ११ असोज। झापा क्षेत्र नम्बर ५ का सत्यनारायण चौधरीले नेपाली कांग्रेसको केन्द्रीय महाधिवेशन प्रतिनिधिका लागि आफ्नो नाम मनोनयन दर्ता गराउनुभएको छ।
लामो समयदेखि नेपाली कांग्रेसमा आबद्ध भएर सामाजिक तथा राजनीतिक क्षेत्रमा सक्रिय चौधरीले पछिल्लो समय रूपान्तरण हुँदै गएको कांग्रेसलाई अझ सशक्त बनाउन आफूले योगदान गर्न चाहेको बताउनुभएको छ।
मधेसी कोटाबाट केन्द्रीय महाधिवेशन प्रतिनिधिका रूपमा मनोनयन दर्ता गराउनुभएका चौधरी यसअघि सम्पन्न विशेष महाधिवेशनमा समेत प्रतिनिधि बन्नुभएको थियो। उहाँले परिवर्तित कांग्रेस निर्माणमा योगदान पुर्याउने उद्देश्यले महाधिवेशन प्रतिनिधिमा उम्मेदवारी दिएको बताउनुभयो।
उहाँले भन्नुभयो, “कांग्रेसप्रति आम जनता र कार्यकर्ताको मन जित्नुपर्छ। देश परिवर्तन गर्न कांग्रेसले नै सक्छ भन्ने कुराको प्रमाणित गर्नुपर्छ। त्यसैले कांग्रेसको महाधिवेशनमा गएर यही सन्देश दिन मनोनयन दर्ता गरेको हुँ।” उहाँले उज्यालो खबरसँगको कुराकानीमा यस्तो बताउनुभएको हो।
२०२५ सालमा जन्मनुभएका चौधरी वडा तथा नगर समितिमा रहेर विभिन्न जिम्मेवारी पूरा गरिसक्नुभएको छ। उहाँ तीन पटकसम्म महाधिवेशन प्रतिनिधि बन्नुभएको छ। अघिल्लो महाधिवेशनमा विनोद चौधरीसँगको मतान्तरका कारण केन्द्रीय सदस्यमा पराजितसमेत हुनुभएको थियो।
चौधरी विगत २५ वर्षदेखि नेपाली कांग्रेसको राजनीतिमा सक्रिय रहँदै आउनुभएको छ।
झापा क्षेत्र नम्बर ५ बाट विभिन्न क्लस्टरबाट ३४ जना महाधिवेशन प्रतिनिधि चयन हुनेछन्। यस क्षेत्रअन्तर्गत पर्ने दमक र गौरीदह नगरपालिका तथा कमल र गौरीगञ्ज गाउँपालिकाबाट निर्वाचित ९ सय ८६ जना क्षेत्रीय प्रतिनिधिले महाधिवेशन प्रतिनिधि चयनका लागि मतदान गर्नेछन्।
निर्वाचन संयोजक लीला खनालका अनुसार मतदान सोमबार बिहान ८ बजेदेखि गौरीगञ्जस्थित सामुदायिक भवनमा हुनेछ।
