इटहरी ,१३ असोज। लामो समयदेखि आवश्यक विवरण तथा कागजात नबुझाई निष्क्रियजस्तै रहेका १५ वटा सहकारी संस्थालाई इटहरी उपमहानगरपालिकाले ३५ दिनभित्र संस्था अद्यावधिक गर्न अल्टिमेटम दिएको छ।
उपमहानगरपालिकाको सहकारी शाखाले सूचना जारी गर्दै लगातार दुई वर्षभन्दा बढी समयदेखि आवश्यक विवरण नबुझाएका सहकारी संस्थाको नामावली सार्वजनिक गरेको हो।
नगर सहकारी ऐन, २०७५ को दफा ५२ तथा नगर सहकारी नियमावली, २०८० को नियम ५५ बमोजिम ती संस्थाको विवरण सार्वजनिक गरिएको उपमहानगरपालिकाले जनाएको छ।
त्यस्तै, सहकारी संघसंस्था दर्ता, सञ्चालन, अनुगमन तथा नियमनसम्बन्धी मापदण्ड, २०८० को दफा २६ को उपदफा ९१० बमोजिम नामावली सार्वजनिक गरिएको हो।
उपमहानगरपालिकाले सूचना प्रकाशित भएको मितिले ३५ दिनभित्र आवश्यक कागजातसहित कार्यालयमा सम्पर्क गरी संस्था अद्यावधिक गर्न सम्बन्धित सहकारीलाई निर्देशन दिएको छ।
तोकिएको अवधिभित्र सम्पर्क नगरेमा प्रचलित कानुनबमोजिम थप कारबाही गर्नुका साथै संस्था खारेजीसम्मको प्रक्रिया अघि बढाउन सकिने चेतावनी उपमहानगरपालिकाले दिएको छ।
के–के कागजात बुझाउनुपर्ने ?
उपमहानगरपालिकाले सम्बन्धित सहकारी संस्थाबाट हालसम्म नबुझाइएका वार्षिक प्रतिवेदन तथा लेखापरीक्षण प्रतिवेदन पेश गर्न भनेको छ।
त्यस्तै, वार्षिक कार्यक्रम तथा नीति–योजना, सञ्चालकहरूको नाम–ठेगानासहितको विवरण, साधारणसभाको बैठकसम्बन्धी जानकारी, शेयर सदस्य संख्या तथा शेयर पुँजी र विभिन्न कोषको विवरणसमेत बुझाउनुपर्नेछ।
सञ्चालक समिति तथा लेखा सुपरिवेक्षण समितिका पदाधिकारी र कर्मचारीको सम्पत्ति विवरणसमेत पेश गर्न उपमहानगरपालिकाले निर्देशन दिएको छ।
उपमहानगरपालिकाले लामो समयदेखि आवश्यक विवरण नबुझाउने सहकारीलाई नियमनको दायरामा ल्याउने क्रममा १५ संस्थाको नाम सार्वजनिक गर्दै अन्तिम अवसर दिएको जनाएको छ।
