जनकपुरधाम , असोज १४। मधेस प्रदेश सरकारले ‘अति विशिष्ट व्यक्ति’ (भीभीआईपी) का लागि साढे ३ करोड रुपैयाँ बराबरको विलासी चारपाङ्ग्रे सवारीसाधन खरिद गर्न आह्वान गरेको बोलपत्र स्थगित गरेको छ । खरिद निर्णयको चौतर्फी आलोचना भएपछि प्रदेश सरकार उक्त प्रक्रियाबाट पछि हटेको हो । प्रदेशका श्रम तथा यातायात मन्त्री शारदादेवी थापाले मुलुकको विषम परिस्थितिमा गाडी खरिद गर्न लागेको भन्दै चर्को आलोचना भएपछि आफूले यो प्रक्रिया रोकिदिएको बताइन् । उनले भनिन्, ‘मुख्यमन्त्री कार्यालयको निर्देशनअनुसार भीभीआईपीका लागि सवारीसाधन खरिद गर्न टेन्डर आह्वान गरिएको थियो । तर, यस्तो विषम परिस्थितिमा गाडी किन्नु कति जायज हुन्छ भनी धेरै ठाउँ र शुभचिन्तकहरूबाट प्रश्न उठ्यो । तत्कालका लागि त्यस्ता भीभीआईपी आउने सम्भावना पनि नरहेकाले यसको आवश्यकता देखिएन । त्यसैले बोलपत्र आह्वान भए पनि अब यो प्रक्रिया अघि नबढ्ने गरी रोकेका छौँ ।’
सवारीसाधन तथा मेसिनरी औजार खरिद वा भाडामा लिने खर्चमा शतप्रतिशत रोक लगाइएको छ ।त्यसैगरी भत्ता, सञ्चार शुल्क तथा विशिष्ट व्यक्ति र प्रतिनिधिमण्डलको भ्रमण खर्चमा २० प्रतिशत, तालिम–गोष्ठी, सशर्त अनुदान, वन–वातावरण संरक्षण र भैपरी आउने खर्चमा ५० प्रतिशत तथा पुँजीगत अनुसन्धान र परामर्श खर्चमा ७५ प्रतिशत कटौती गरिएको छ । तर, खर्च नियन्त्रणको यही नीतिका बाबजुद भीभीआईपीका नाममा साढे ३ करोडको गाडी किन्ने प्रक्रिया अघि बढाइएको थियो ।बजेट खर्चसम्बन्धी निर्देशिकामा मुख्यमन्त्रीका लागिसमेत बढीमा करिब डेढ करोड रुपैयाँसम्मको मात्र गाडी खरिद गर्न सकिने व्यवस्था छ । तर, त्यसविपरीत ३ करोड ५० लाखको विलासी गाडी खरिद गर्न खोजिएपछि यो विषय थप पेचिलो बनेको थियो । आम्दानीको स्रोत सीमित भएको र प्रदेश सरकार आफैँले विभिन्न विकास तथा प्रशासनिक बजेट रोक्का राखेको अवस्थामा भीभीआईपीका नाममा गरिएको यस्तो खरिद प्रयासको प्रदेश सांसद तथा स्थानीयले चर्को विरोध गर्दै आएका थिए ।
