विराटनगर । मोरङको बूढीगङ्गा गाउँपालिका–१ की एक वर्षीया बालिकालाई अपहरण गरेको आरोपमा पक्राउ परेका प्रेमी जोडी पुर्पक्षका लागि जेल चलान भएका छन् ।
दीपेन यादवकी छोरी निकिशा यादवलाई अपहरण गरेको आरोपमा पक्राउ परेका विराटनगर–६ रामपुर चौकका २७ वर्षीय रविन्द्रकुमार साह र विराटनगर–५ कारखाना टोलकी २७ वर्षीया अनु साह जेल चलान भएका हुन् । पुर्पक्षका लागि जेल चलान भएका रविन्द्र र अनु प्रेमी–प्रेमिका हुन् ।
मोरङ अदालतका न्यायाधीश दुर्गाप्रसाद ढुङ्गेलको इजलासले पक्राउ परेका दुवै जनालाई पुर्पक्षका लागि थुनामा राख्ने आदेश गरेपछि सोमबार मोरङ कारागार चलान भएको सूचना अधिकारी हेमबहादुर बुढाथोकीले जानकारी दिए ।
२ साउनमा विराटनगर–१२ रोडशेष चौकबाट अनु र रविन्द्रले बालिकालाई अपहरण गरेर भारतको दरभङ्गा पु¥याएका थिए । अपहरण गरेको दुई दिनपछि प्रहरीले दरभङ्गाबाट उद्धार गरेर ४ साउनमा विराटनगर ल्याएर परिवारलाई जिम्मा लगाएको थियो भने पक्राउ परेका आरोपीलाई पत्रकार सम्मेलन गरी सार्वजनिक गरेको थियो ।
पक्राउ परेकामध्ये बालिका अपहरण गर्ने मुख्य योजनाकार रविन्द्र रहेको प्रहरीको अनुसन्धानबाट खुलेको छ । उनीहरूले १५ लाख रुपैयाँ फिरौती लिने उद्देश्यले बालिकाको अपहरण गरेको अनुसन्धानबाट खुलेको मोरङ प्रहरी प्रमुख एसपी शान्तिराज कोइरालाले जानकारी दिए ।
रविन्द्र र बालिकाका बुबा दीपेन सानैदेखिका साथी हुन् । दीपेन पेशाले इन्जिनियर हुन् । दीपेनकी पत्नी अध्ययनका लागि काठमाडौंमा बस्दै आएकी छन् । ‘दीपेनको आर्थिक अवस्था मजबुत भएको कारणले रविन्द्र पैसाको लोभमा परेको देखिएको छ । सम्पत्तिमा आँखा गाडेका रविन्द्रले आफ्नी प्रेमिका अनुको सहारा लिए ।
अनु र दीपेशलाई रविन्द्रले चिनजान पनि गराइदिए’ मोरङ प्रहरी प्रमुख कोइरालाले भने, ‘यो चिनजान अढाई महिनाअघि मात्रै भएको देखिन्छ ।’ यसबीचमा अनुले दीपेनसँग ‘प्रेम’ मा परेको अभिनय गर्न थालिन् । दीपेन पनि उनीसँग नजिकिएको देखिएको प्रहरीको भनाइ छ ।
