मोरङको सुनवर्षी नगरपालिका–९ डाइनियामा सर्पदंशका कारण बुधबार राति एक जनाको मृत्यु भएको छ ।
सर्पले टोकेर सुनवर्षी–९ का २९ वर्षीय सञ्जय सिंहको मृत्यु भएको प्रहरीले जनाएको छ । प्रहरीका अनुसार बाहिरबाट घर फर्कने क्रममा राति १२ बजेतिर उनको खुट्टामा सर्पले टोकेको खुलेको छ । उनलाई कुन सर्पले टोकेको हो भन्ने यकिन हुन बाँकी रहेको मोरङ प्रहरीका प्रवक्ता डिएसपी दीपक श्रेष्ठले जानकारी दिए ।
घरनिजकै आइपुगेपछि आफूलाई सर्पले टोकेको भनेर उनले परिवारमा जानकारी गराएका थिए । त्यसलगत्तै आमाले उपचारका लागि रङ्गेली अस्पताल ल्याउने क्रममा बाटैमा सिंहको मृत्यु भएको डिएसपी श्रेष्ठको भनाइ छ ।
उनका अनुसार शव रङ्गेली अस्पतालमै राखेर घटनाको अनुसन्धान सुरु गरिएको छ । गर्मी मौसमसँगै पछिल्लो समय तराईमा सर्पदंशका बिरामी बढ्न थालेका छन् ।
