तीव्र गतिमा रहेको टिपरले ठक्कर दिँदा आइतबार दिउँसो मोरङको सुन्दरहरैँचा नगरपालिकामा मोटरसाइकल चालकको मृत्यु भएको छ ।
पूर्व–पश्चिम लोकमार्गअन्तर्गत सुन्दरहरैँचा–४ मा पूर्वतर्फ जाँदै गरेको प्रदेश १–०२–००१ ख ८३३२ नम्बरको टिपरले पश्चिमतर्फ आउँदै गरेको को ३८ प ५९५० नम्बरको मोटरसाइकललाई ठक्कर दिँदा दुर्घटना भएको हो । मोरङ ट्राफिक प्रमुख प्रहरी निरीक्षक राजकुमार कार्कीले दुर्घटनामा मोटरसाइकल चालक सुन्दरहरैँचा–४ का २९ वर्षीय कुमार राईको मृत्यु भएको जानकारी दिए ।
दिउँसो १ः२५ बजेतिर दुर्घटना हुँदा राई गम्भीर घाइते भएका थिए । उनको उपचारका क्रममा धरानस्थित बिपी कोइराला स्वास्थ्य विज्ञान प्रतिष्ठानमा दिउँसो २ः१५ बजेतिर मृत्यु भएको प्रहरीले जनाएको छ । सामुदायिक अस्पताल इटहरीमा उपचार हुन नसकेपछि थप उपचारका लागि राईलाई धरान लगिएको थियो ।
टिपर चालक सुनसरीको इटहरी उपमहानगरपालिका–१ का ३७ वर्षीय राजकुमार चौधरीलाई प्रहरीले नियन्त्रणमा लिएको छ । प्रहरीले घटनाको अनुसन्धान सुरु गरिएको र टिपरको तीव्र गतिका कारण दुर्घटना भएको जानकारी दिए ।
