मोरङको लेटाङमा तीन जना बालिका सम्पर्कविहीन बनेका छन् । शनिबार बिहान ११ बजेतिर घरबाट हिँडेका उनीहरु भोलिपल्ट बिहानसम्म फर्किएका छैनन् ।
मोरङ प्रहरीका प्रवक्ता डिएसपी दीपक श्रेष्ठका अनुसार लेटाङ नगरपालिका–३ की १३ वर्षीया रक्षा दर्नाल, लेटाङ–४ की १२ वर्षीया अनुष्का राई र १४ वर्षीया सविना राईको अवस्था अहिलेसम्म पत्ता लाग्न नसकेको हो । अघिल्लो दिन घरबाट हिँडेका तीनै जना आज (आइतबार) बिहानसम्म अभिभावकको सम्पर्कमा नआएको श्रेष्ठले बताए ।
प्रहरीको प्रारम्भिक अनुसन्धानबाट उनीहरु फुटबल हेर्न भनेर घरबाट निस्किएका थिए । तर गाउँमा फुटबल प्रतियोगिता आयोजना भएको छैन । अभिभावकलाई ढाँटेर घरबाट निस्किएका उनीहरु कहाँ गए भन्ने बारेमा केही पनि खुल्न नसकेको प्रहरीले जनाएको छ ।
अभिभावक, आफन्त र स्थानीयको सहयोगमा खोजी तीव्र पारिए पनि फेला पार्न नसकिएको डिएसपी श्रेष्ठको भनाइ छ । प्रहरीले घटनाका बारेमा आइतबार बिहान मात्रै जानकारी पाएको हो । श्रेष्ठका अनुसार अभिभावक र आफन्तले रातभर खोजी गर्दा पनि फेला पार्न नसकेपछि प्रहरीलाई घटनाको जानकारी गराएका हुन् ।
‘शनिबार बिहान घरबाट निस्किएका बालिकाहरु साँझसम्म नफर्किएपछि अभिभावक र आफन्तले खोजी थालेछन् । तर रातभर खोज्दा पनि फेला पार्न सकेनन्,’ उनले भने, ‘भोलिपल्ट बिहान मात्रै प्रहरीलाई घटनाको जानकारी गराइयो । प्रहरीमा घटनाको जानकारी नै ढिलो आयो ।’
श्रेष्ठका अनुसार विभिन्न ठाउँमा हुलिया परिपत्र गरेर तीनै जनाको खोजी जारी राखिएको छ । तर सम्पर्कविहीन बनेका बालिकाहरुको अवस्था पत्ता लाग्न नसकेको उनले बताए । तीनै जना लेटाङको शान्ति भगवती माध्यमिक विद्यालयको कक्षा ७ मा अध्ययरत थिए ।
