विराटनगर । महानगरबासीको गुनासो सुन्न र सम्बोधन गर्न विराटनगर महानगरले हटलाइन (टोल फ्रि) सेवा सञ्चालनमा ल्याएको छ ।
महानगरवासीका कुनै पनि गुनासा भए हटलाइन नम्बरमा फोन गरेर टिपाउन सक्ने मेयर नागेश कोइरालाको भनाइ छ । हटलाइन सेवा चौवीसै घन्टा खुल्ला रहनेछ । ‘महानगरवासीले महानगरसँग सम्बन्धित जुनसुकै समस्या र गुनासो हटलाइन नम्बरमा फोन गरेर टिपाउन सक्नुहुनेछ,’ मेयर कोइरालाले भने, ‘आएका गुनासा र सुझावलाई सम्बन्धित महाशाखा र शाखामार्फत प्राथमिकताका आधारमा सम्बोधन गरिनेछ ।’
महानगरले सञ्चालनमा ल्याएको हटलाइन नम्बर १६६०२१४२२२२ रहेको छ । महानगरवासीले इमेल गरेर समेत आफ्ना गुनासा र सुझाव दिन सक्ने व्यवस्था मिलाइएको मेयर कोइरालाले बताए । उनका अनुसार केही हप्ता पहिलादेखि नै हटलाइन सेवा परीक्षणका लागि सञ्चालनमा ल्याइएको थियो । असोज १ गतेदेखि भने औपचारिक रुपमा सञ्चालनमा ल्याइएको उनको भनाइ छ ।
हटलाइनको व्यवस्थापनको जिम्मा नगर प्रहरीलाई दिइएको उपमेयर शिल्पा निराला कार्कीले जानकारी दिइन् । हटलाइनमार्फत आएका गुनासा र सुझाव नगर प्रहरीले टिपोर्ट गरेर मेयर र उपमेयरसहित सम्बन्धित महाशाखा र शाखा प्रमुखलाई उपलब्ध गराउनेछ ।
