बिर्तामोड — झापाको बिर्तामोडमा दुई वटा मोटरसाइकल ठोक्किँदा भएको दुर्घटनामा दुवै मोटरसाइकलका चालकको मृत्यु भएको छ । दुई जना घाइते भएका छन् ।
सोमबार बेलुका पौने ५ बजेतिर बिर्तामोड नगरपालिका २ बेलडाँगीमा मे ५ प १६०४ र मे ३ प ५५८० नम्बरको मोटरसाइकल आपसमा ठोक्किँदा दुर्घटना भएको थियो ।
दुर्घटनामा परी ५५८० नम्बरको मोटरसाइकल चालक बाह्रदशी गाउँपालिका २ का २५ वर्षीय अनिस साउदेन र १६०४ नम्बरका मोटरसाइकल चालक बाह्रदशी ६ का ४३ वर्षीय भोलाराज भुजेलको मृत्यु भएको जिल्ला प्रहरी कार्यालयले जनाएको छ ।
दुर्घटनामा परी १६०४ नम्बरको मोटरसाइकलमा सवार भुजेलकी श्रीमती ४२ वर्षीया चन्द्रकला र ९ वर्षीया छोरी प्रशना घाइते भएका छन् । उनीहरुको बिर्तामोडमा उपचार भइरहेको छ ।
