बढ्दो चिसोसँगै जनजीवन प्रभावित हुन थालेको छ । चिसो मौसमले फ्लुलगायत स्वास्थ्य समस्या निम्त्याउँदा अस्पतालहरूमा बिरामीसमेत बढ्न थालेका छन् ।
खासगरी, बालबालिका, गर्भवती, वृद्धवृद्धा र दीर्घरोगीहरू चिसोबाट बढी प्रभावित भइरहेका छन् । यस्तै, कोभिड संक्रमणका कारण गम्भीर बनेका वयस्कहरूमा समेत चिसोले चाँडै थप समस्या बढाउने जोखिम पनि छ ।
कोभिड संक्रमणको अर्को लहरको जोखिम बढेको र मौसमका कारणसमेत स्वास्थ्यमा समस्या देखिन थालेकाले विशेष ध्यान दिन आवश्यक छ । चिसोले विशेषगरी रुघाखोकी, ज्वरो, निमोनियाजस्ता समस्या पार्ने गर्छ । यसबाहेक दम, बाथ र अन्य दीर्घरोगीलाई पनि चिसो घातक हुन्छ ।
उपचारका लागि अस्पताल आउने अधिकांश बिरामीमा मांसपेशीको दुखाइ र अत्यधिक कमजोरीपन देखिएको छ । त्यसैले चिसोबाट बच्न सावधानी अपनाउनुको विकल्प छैन ।
जथाभावी औषधि नखान चिकित्सकको सुझाव
स्वास्थ्यसम्बन्धी कुनै पनि समस्या जस्तै– ज्वरो, रुघाखोकी, झाडापखाला, श्वासप्रश्वासमा समस्या, शरीर दुखाइ, निमोनिया र दमको समस्या देखिएमा तुरुन्त नजिकको स्वास्थ्य संस्थामा सम्पर्क गर्न डाक्टर मिलन खड्काको सुझाव छ । आफैँले जथाभावी औषधि सेवन भने गर्नुहुँदैन ।
चिसोबाट बच्नको लागि सबै भन्दा पहिला शरीर पूरै ढाक्ने गरी बाक्लो तथा न्यानो लुगा लगाउनु पर्छ । चिसोमा वृद्धवृद्धा, बालबालिका र दीर्घरोगीहरू सकेसम्म अत्यधिक चिसो हुने स्थानमा जानु हुँदैन ।
चिसोबाट बच्न आगो, हिटर बालेर कोठा बन्द गर्दा ज्यान जाने घटना पनि बढिरहेका छन् । तसर्थ, कोठा न्यानो बनाउँदा भेन्टिलेसनको व्यवस्था गर्न छुटाउनु हुँदैन । कोठामा पर्याप्त हावा ओहोरदोहोर हुने व्यवस्था गर्नुपर्छ ।
