दमक, ८ साउन ÷ आफ्नो टोल बस्तीलाई कस्तो बनाउने भन्ने कुरा त्यहीँका स्थानीयमा निर्भर रहन्छ । टोलका हरेक गतिविधिको व्यवस्थापन र विकासका लागि स्थानीयले नीति, कार्यक्रम र बजेट बनाउने स्वायत्त अधिकार रहन्छ ।
यस्तै आफ्ना लागि आफैं नीति बनाउने सन्दर्भमा मंगलबार भएको कार्यक्रममा दमक नगरपालिकाको ६ नम्बर वडाबासीले ‘आफ्नो टोल आफैं बनाउन’ ४ बुँदे प्रतिवद्धता जाहेर गरेका छन् । वडाले ल्याएको ‘आफ्नो टोल आफैं बनाऔं’ भन्ने अवधारणा अन्तर्गत आफ्नो घर तथा व्यवसायबाट निस्केको फोहोरमैलालाई कुहिने र नकुहिने छुट्याई फरक फरक डस्टविनमा राख्ने, आफ्नो अगाडिको फुटपाथ आफुले पनि अतिक्रमण नगर्ने र अरुलाई पनि अतिक्रमण गर्न नदिने बुँदामा सहमत भएर वडाबासीले हस्ताक्षर गरेका छन् । त्यसका साथै वरपरका बोटविरुवाको संरक्षण गरी सुन्दर हरियाली वडा बनाउन अग्रसर हुने र वडालाई प्लाष्टिकमुक्त बनाउन प्लाष्टिकजन्य झोलाको प्रयोग र बिक्रीवितरण नगर्ने प्रतिवद्धता जाहेर भएको छ ।
आफुले अधिकारमात्र लिने नभई कर्तव्य समेत पुरा गर्ने सन्देशका साथ वडा कार्यालयले कार्यक्रम ल्याएको वडाध्यक्ष टेकबहादुर थापाले प्रष्ट्याउनु भयो । उहाँले राजनीतिक दल, टोल विकास संस्था सहितका संघसंस्थाका प्रतिनिधिहरुलाई सामेल गरेर आफ्नो टोल आफैं बनाउने कार्यक्रम कार्यान्वयनमा अघि बढाउँदै लगिने योजना सुनाउनु भयो ।
यसखाले कार्यक्रम वडालाई व्यवस्थित बनाउने हिसावले उत्तम भएपनि कार्यान्वयनमा के होला भन्ने सहभागिको जिज्ञासा छ । अनि कार्यान्वय पक्षमा जोड दिनुपर्ने सुझाव छ ।
आफ्नो टोल कस्तो बनाउने भन्ने जिम्मा वडाबासीलाई नै सुम्पिदै दमक ६ नम्बर वडाले ल्याएको यसखाले कार्यक्रमले अधिकार माग्नुसँगै कर्तव्य पनि पुरा गर्ने सन्देश दिएको छ । वडावासीको साझा सहमतिमा गरिने प्रतिवद्धतालाई कार्यान्वयनमा उतार्न सबैको उस्तै कसिलो सहकार्य आवश्यक पर्दछ ।
