दमक, कार्तिक ४
बहुप्राविधिक शिक्षालयका रुपमा विभिन्न विषयमा डिप्लोमा तहको अध्यापन गराउँदै आएको दमक १ स्थित पुष्प- धीरेन्द्र स्मृति प्रतिष्ठानले निःशुल्क रुपमा औद्योगिक प्रशिक्षार्थी प्रि डिप्लोमा तहको इन्फरमेशन टेक्नोलोजी तालिम प्रदान गर्ने भएको छ ।
प्राविधिक शिक्षा तथा व्यवसायिक तालिम परिषदको समन्वयमा कोशी प्रदेश सरकारको सामाजिक विकास मन्त्रालय र दिगो तथा सम्मानित रोजगारीका लागि सीप परियोजना अन्तर्गत औद्योगिक प्रशिक्षार्थी तालिमका रुपमा २४ महिने प्रि डिप्लोमा तहको इन्फरमेशन टेक्नोलोजी सम्बन्धि अध्यापन गराइने भएको हो । एसएलसी वा एससीई उत्तिणर्का लागि कार्तिक ६ गतेसम्ममा आवेदन गर्न प्रतिष्ठानले सार्वजनिक सूचना जारी गरी जानकारी गराएको छ । जसमा ३० जनाको कोटा रहेको उल्लेख गरिएको छ ।
मुख्य रुपमा आर्थिक रुपले कमजोर अवस्था भएका तथा द्वन्द पीडितहरुका लागि यसखाले निःशुल्क तालिम प्रदान गरिने प्रतिष्ठानका अध्यक्ष तीर्थराज बस्नेत शंकरले जनाउनु भयो । उहाँले यसअघि पनि विभिन्न विषयमा निःशुल्क शिक्षणको व्यवस्था गर्दै आएको उल्लेख गर्नुभयो ।
सरकार -माओवादी द्वन्दकालमा वेपत्ता भएका दमक १ का पुष्प र धीरेन्द्र बस्नेत दाजुभाइको स्मृतिमा २०७५ सालमा सो प्रतिष्ठान स्थापना भएर सिभिल इन्जिनियरिङ, जियोमेट्रिक इन्जिनियरिङ, कम्प्युटर इन्जिनियरिङको डिप्लोमा तहको अध्यापन गराउँदै आएको छ । विभिन्न विषयमा छोटो अवधिका प्राविधिक तालिम समेत यसले सञ्चालन गर्दै आएको छ ।
