पथरी, माघ ३
आफ्नी १७ वर्षीया छोरीको दुवै मिर्गौलामा समस्या भएपछि मोरङ पथरीशनिश्चरे नगरपालिका ९ खरेल डाँडा निवासी शान्ति राईले उपचारका लागि सहयोगको याचना गर्नुभएको छ ।
पढ्दै गरेकी छोरी सलिनाको दुवै मिर्लौलामा समस्या भएको र उपचार गराउँदा जायथेथा सकिँदा पनि निको पार्न नसकिएको शान्तिले चिन्ता प्रकट गर्दै आर्थिक सहयोग जुटेर थप उपचार गराउनले अपेक्षामा सबैसँग अपिल गर्नुभएको छ ।
स्थानीय भागिरथ मावि कक्षा १२ मा पढ्दै गरेको अवस्थामा सलिना २०८१ जेठदेखि बिरामी पर्नुभयो । नाजुक आर्थिक अवस्थाको पाँचजनाको परिवारको गुजारा र छोरीको डाइलासिस गर्दा लाग्ने खर्च जुटाउन नसकेर शान्ति र उहाँका श्रीमान् विपिनलाई निकै समस्या परेको छ । राई परिवार अहिले उपचार गराउँदा भएभरको जायजेथा सकिएपछि छोरीको जीवन बचाइदिन सबैसँग सहयोगको याचना गर्न पुगेको हो ।
सलिनाको बुढीगंगास्थित विराट टिचिङ हस्पिटलमा नियमित डाइलासिस भइरहेको बुबा विपिनले बताउनु भयो । ‘डाइलासिस निःशुल्क भएपनि रगत दिँदा, केही औषधी र सुई लगाउनु पर्दा पैसा आफैंले तिर्नुपर्छ । हप्ताको दुई पटक डाइलासिस गर्नुपर्छ । त्यतिबेला कम्तिमा तीन हजार रुपैयाँ खर्च लाग्छ । पाँचजनाको परिवार पाल्ने जिम्मेवारी पनि छ ।’ शान्तिका श्रीमान् विपिनले समस्या सुनाउँदै भन्नुभयो, ‘छोरीलाई बचाउन डाइलासिसले मात्र हुँदैन । मृगौला नै प्रत्यारोपण गर्नुपर्छ । छोरीको ब्लड ग्रुपसँग मेरो मिल्छ तर प्रत्यारोपण गर्ने खर्च हामीसँग छैन । कसरी छोरी बचाउँ ?’ आफ्नो एउटा मृगौला छोरीकोमा प्रत्यारोपण गर्न चिकित्सकले १० लाख रुपैयाँ खर्च लाग्ने बताएको उहाँले सुनाउनु भयो ।
आफुसँग भएको सबै रकम सकिएर साथीभाइसँग सरसापटी गरी उपचार गर्दा अहिलेसम्म ६ लाख रुपैयाँ खर्च भइसकेको विपिनले बताउनु भयो । छोरीको उपचार खर्च जुुटाउन विपिन वैदेशिक रोजगारीका लागि गत साउनमा दुबई पुग्नु भएको थियो । तर छोरीको अवस्था नाजुक बन्दै गएपछि परिवारको आग्रहमा उहाँ ३ महिनामै असोजमा नेपाल फर्किनु भएपछि रोजगारी गुमेको छ । आफ्नो रोजगारी गुमेपछि छोरीको उपचार गराउन ज्यादै सकस परेको विपिनले बिलौना गर्नुभयो ।
‘डाक्टरले जतिसक्दो चाँडो मृगौला प्रत्यारोपण गर्न सल्लाह दिएका छन्,’ विपिनले भन्नुभयो, ‘तर, म आफू एक्लैले छोरीको जीवन बचाउन सक्ने अवस्था छैन, कोही इष्टमित्र, साथीभाइ र मनकारी सहयोगीको सहयोग भएमा मात्र मेरो छोरीले जीवन पाउँछिन् ।’
विपिनको सम्पर्क नम्बर ९७०६६७१५८६ र ९८०७०८९४४८ रहेको छ । सहयोग गर्न चाहने महानुभावले शान्ति राईको नाममा रहेको सप्तकोसी डेभलपमेन्ट बैक लिमिटेडको खाता नम्बर ०१३००००६२७०१५ मा रकम जम्मा गर्न सकिने छ ।
